राज ठाकरे यांच्या पुणे दौऱ्यानंतरही मनसे पक्षातील अंतर्गत वाद आणि नाराजीचे सुर दिसून येत आहेत. याच पार्श्वभूमीवर आज (शनिवारी) मनसेप्रमुख राज ठाकरेंनी महत्त्वाचा निर्णय घेतला आहे. मनसेच्या माथाडी कामगार सेनेचे पुणे जिल्हाध्यक्ष निलेश माझिरे यांची राज ठाकरे यांनी पदावरुन हकालपट्टी केल्याची माहिती समोर आली आहे. मनसे नेते शिरीष सावंत यांनी याबाबतची माहिती दिली आहे. या घटनेमुळे पुन्हा एकदा मनसे मधील अंतर्गत वाद चव्हाट्यावर आले आहेत.

दरम्यान, काही दिवसांपूर्वी निलेश माझिरे नाराज असल्याच्या आणि पक्ष सोडल्याच्या असल्याच्या चर्चा सुरू होत्या. त्याच काळात मनसेचे माजी पुणे शहर अध्यक्ष वसंत मोरे आणि निलेश माझिरे यांनी शिवतीर्थवर राज ठाकरे यांची भेट घेतली होती. यावेळी राज ठाकरे यांनी मनसे सोडलेल्या निलेश माझिरेंची समजूत काढली होती. त्यानंतरच त्यांना पुणे जिल्हा माथाडी कामगार सेनेचे जिल्हाध्यक्ष पद देण्यात आले होते. निलेश माझिरे जिल्हाध्यक्षपदाला स्थानिक नेते विरोध करत असल्याने निलेश माझिरे यांनी मनसे सोडण्याचा निर्णय घेतला होता.

हे ही वाचा : वाचा किस्से बँकेच्या लाॅकररुममध्ये घडलेले...एका बँक अधिकाऱ्याच्याच तोंडून

वसंत मोरेही मनसेवर नाराज असल्याच्या चर्चा

मनसेप्रमुख राज ठाकरे यांनी मशिदीवरील भोंगे हटवण्याबाबत घेतलेल्या भूमिकेला वसंत मोरेंनी विरोध दर्शवला होता. वसंत मोरे यांच्या या भूमिकेमुळे राज ठाकरे आणि पुण्यातील मनसेचे नेते नाराज झाले होते. परंतु तेव्हाही वसंत पक्षासोबत असल्याचं बोलले होते. त्यानंतर अलीकडेच वसंत मोरे यांनी राष्ट्रवादी काँग्रेसचे आमदार निलेश लंके यांची भेट घेतली. तर या भेटीमुळे राजकीय वर्तुळात चर्चांना उधाण आलं होतं.