राज्यात आगामी काळात होणाऱ्या स्थानिक स्वराज्य संस्थांच्या निवडणुकांसाठी सर्व राजकीय पक्षांनी तयारी सुरु केल्याचे पाहायला मिळते आहे. राज्यात महाविकास आघाडी सरकारमध्ये सहभागी असलेले सर्व पक्ष आणि विरोधी पक्ष यांच्यातील वेगवेळी राजकीय समीकरणांवर सध्या चर्चेचा विषय आहे. त्यातच आता शिवसेनेने सोडचिठ्ठी दिलेल्या भारतीय जनता पक्षाने मनसे सोबत युती करण्याचे संकेत काही दिवसांपूर्वी दिले होते. त्यानुसार आता मनसे आणि भाजप पालघर जिल्ह्यात युती करणार आहेत.

पालघरमध्ये आगामी काळातील पोटनिवडणुकीत महाराष्ट्र नवनिर्माण सेना आणि भारतीय जनता पक्ष (BJP MNS Alliance) एकत्र येणार असल्याचे स्पष्ट झाले आहे. पालघरमधील जिल्हा परिषद आणि पंचायसमितीच्या पोटनिलडणुकांमध्ये मनसे आणि भाजपची युती झाली आहे. भारतीय जनता पक्षाचे पालघर जिल्हाध्यक्ष नंदकुमार पाटील यांनी आता अधिकृत घोषणा करत ही माहिती दिली आहे.

महाराष्ट्र नवनिर्माण सेनेने आता हिंदुत्वावादी विचारसरणीसाठी आक्रमक होण्याची भूमिका स्विकारली. मागच्या दिवसात पक्षामध्ये झेंड्यापासून अनेक गोष्टींमध्ये बदल करण्यात आले आहेत. तर दुसरीकडे शिवसेनेने राष्ट्रवादी आणि काँग्रेससोबत युती केल्यामुळे महाराष्ट्राच्या राजकारणात एक पोकळी निर्माण झाली आहे. ही पोकळी भरुन काढण्याचा प्रयत्न भारतीय जनता पक्षाकड़ून करण्याचा प्रयत्न मनसे करु शकते असा अंदाज राजकीय तज्ञांकडून वर्तवला जातो आहे.