मुंबई : हिंदुत्त्वाच्या मुद्यावरुन सध्या शिवसेना आणि भाजपमध्ये शब्दयुद्ध सुरू आहे. शिवसेनेचे (shivsena) खासदार संजय राऊत (Sanjay Raut) यांनी भाजपला (bjp) उत्तर देताना एक व्यंगचित्र ट्विट केलं होतं. त्या व्यंगचित्रावरुन आता नवा वाद सुरु होण्याची शक्यता आहे. संजय राऊत यांचं ट्विट समोर आल्यानंतर भाजपचे दिवंगत नेते प्रमोद महाजन (pramod mahajan) यांच्या कन्या आणि खासदार पूनम महाजन (poonam mahajan) यांनी संताप व्यक्त करत संजय राऊत यांना चोख प्रत्युत्तर दिलं आहे. (Poonam Mahajan Slam on Sanjay Raut's Cartoon)

संजय राऊत यांनी नंतर ते ट्विट डिलीट केलं, मात्र...

संजय राऊत यांनी नंतर ते ट्विट डिलीट केलं मात्र भाजपच्या खासदार पूनम महाजन यांनी आता प्रत्युत्तर दिलं आहे. “स्वर्गीय बाळासाहेब व स्वर्गीय प्रमोदजी, या दोन मर्दांनी हिंदुत्वासाठी युती केली होती. नामर्दांसारखे कार्टून दाखवू नका”, अशा शब्दात पूनम महाजन यांनी संजय राऊत यांना उत्तर दिलं आहे.

हिंदुत्त्वाच्या मुद्यावरुन शब्दयुद्ध

मुख्यमंत्री उद्धव ठाकरे यांनी शिवसेनाप्रमुख बाळासाहेब ठाकरे यांच्या जयंतीनिमित्त शिवसैनिकांशी संवाद साधला. या संवादामध्ये हिंदुत्त्वाच्या मुद्यावरुन उद्धव ठाकरे यांनी भाजपला फटकारलं होतं. त्यानंतर भाजपाचे देवेंद्र फडणवीस व चंद्रकांत पाटील यांनी शिवसेनेला जोरदार प्रत्युत्तर दिलं होतं.