नागपूर - विदर्भातील उन्हाच्या लाटेने रौद्ररूप धारण केले असून, बुधवारी ब्रह्मपुरी येथे जगात सर्वाधिक तापमानाची नोंद करण्यात आली. जगातील पहिल्या पाच उष्ण शहरांमध्ये विदर्भातील तीन शहरांचा समावेश आहे, हे उल्लेखनीय. उष्णतेची लाट आणखी दोन दिवस कायम राहण्याची शक्‍यता आहे.

या महिन्यात प्रथमच चार शहरांचा पारा ४६ अंशांवर गेला. सर्वाधिक तापमानाची नोंद ब्रह्मपुरी येथे करण्यात आली. येथे नोंद झालेले ४६.५ अंश सेल्सिअस तापमान केवळ देशातच नव्हे, संपूर्ण जगात सर्वाधिक ठरले. ब्रह्मपुरीपाठोपाठ चंद्रपूर येथे ४६.४ आणि नागपूर येथे ४६ अंश सेल्सिअस तपमानाची नोंद करण्यात आली. जागतिक तापमानाची नोंद ठेवणाऱ्या ‘एल डोराडो’ या संकेतस्थळानुसार, बुधवारी जगातील पहिल्या पाच ‘हॉट’ शहरांमध्ये विदर्भातील तीन शहरांचा समावेश आहे. ब्रह्मपुरी पहिल्या, चंद्रपूर दुसऱ्या, इजिप्तमधील बहरिया (४६.० अंश सेल्सिअस) शहर तिसऱ्या, मध्य प्रदेशातील खरगोन (४६.० अंश सेल्सिअस) चौथ्या आणि नागपूर पाचव्या स्थानावर राहिले. वर्धा येथेही पारा ४६ अंश सेल्सिअसवर गेला. 

विदर्भात उन्हाची लाट आणखी दोन दिवस कायम राहणार असून, तापमानात आणखी वाढ होण्याची शक्‍यता वर्तविण्यात आली आहे.