सोलापूर : शहराचा पाणीपुरवठा नियमित व्हावा, यासाठी २०२१ मध्ये सोलापूर ते उजनी समांतर जलवाहिनीस मंजुरी मिळाली. अनेक अडथळ्यांची शर्यत पार करून १ जून २०२३ रोजी ६६५ कोटींच्या पाइपलाइनचे काम सुरू झाले. पण, दोनवेळा मुदतवाढ देऊनही उजनी धरण ते सोलापूर-पुणे महामार्ग या अंतरावरील ३०० मीटरचे काम शेतकऱ्याच्या विरोधामुळे थांबलेलेच आहे. त्यामुळे कामासाठी महापालिकेला १५ दिवसांची पुन्हा मुदतवाढ द्यावी लागली आहे. दुसरीकडे धरण उणे १५ टक्क्यांवर पोचल्याने महापालिकेने संभाव्य पाणीटंचाई ध्यानात घेऊन दुबार पंपिंगची तयारी सुरू केली आहे.

सोलापूर शहराचा स्मार्ट सिटीत समावेश झाला आणि योजनेअंतर्गत विविध कामांसाठी एक हजार कोटींचा खर्च करण्यात आला. पण, शहराचा पाणीपुरवठा चार-पाच दिवसाआडच राहिला. महापालिकेवर काँग्रेस-राष्ट्रवादी काँग्रेस, भाजप-शिवसेनेची सत्ता राहिली, तरीपण १५ ते २० वर्षांपासून शहरातील नागरिकांना दररोज पाणी मिळू शकले नाही. सध्या सुरू असलेली समांतर जलवाहिनी झाल्यावर निश्चितपणे आपल्याला दररोज पाणी मिळेल, अशी आशा सोलापूरकरांना आहे. मात्र, ‘अमृत-दोन’ योजनेच्या प्रस्तावाला अंतिम मान्यता मिळून त्यातून ८८२ कोटींची कामे होणार नाहीत, तोवर दररोज पाणीपुरवठा शक्य नाही, असे खुद्द महापालिकेचेच अधिकारी सांगत आहेत.

दुसरीकडे पाकणी येथील जलशुद्धीकरण केंद्राला देखील अजून जागा मिळाली नाही. त्यामुळे आता शहरातील लोकप्रतिनिधींना महाराष्ट्र जीवन प्राधिकरणाकडील तो प्रस्ताव मंजूर करून घेण्यासाठी पाठपुरावा केल्यास निश्चितपणे लवकरच निधी मिळेल, असेही अधिकाऱ्यांनी सांगितले. शेतकऱ्यांच्या अडथळ्यामुळे काम लांबल्याने आता पाइपलाइनचे प्रात्यक्षिक मेअखेर होईल, असेही अधिकाऱ्यांनी ‘सकाळ’शी बोलताना स्पष्ट केले.

मेअखेर होईल समांतर जलवाहिनीचे ट्रायल

सोलापूर ते उजनी समांतर जलवाहिनीचे काम अंतिम टप्प्यात असून आता धरण ते सोलापूर-पुणे हायवे या अंतरावरील ३०० मीटरचे काम बाकी आहे. मोडनिंब परिसरातील ४० मीटर काम देखील दोन-चार दिवसात होईल. साधारणतः ५ मेपर्यंत काम पूर्ण करण्याचे नियोजन आहे.

- व्यंकटेश चौबे, सार्वजनिक आरोग्य अभियंता, महापालिका, सोलापूर

शेतकऱ्यांचा विरोध अन्‌ महापालिकेची कसरत

उजनी धरणापासून सोलापूर-पुणे महामार्गापर्यंत काही शेतकऱ्यांच्या जमिनीतून पाइपलाइन आणावी लागणार आहे. शेतकऱ्यांनी कामासाठी परवानगी दिली, पण माती काढताना, पाइप घेऊन जाताना १२ मीटर सोडून इतरत्र दोन-पाच फुटावर जरी माती पडली तर शेतकरी विरोध करीत आहेत. एकाने तर बायको, मुलासह आत्मदहनाचाच इशारा दिला. त्यामुळे महापालिका अधिकाऱ्यांना ३०० मीटर अंतराचे काम करताना तारेवरील कसरत करावी लागत आहे. आता खोदाई ५० फूट राहिली असून पुढील आठवड्यात काम पूर्ण होईल, असे अधिकाऱ्यांनी सांगितले.