मुंबई - राज्याच्या विधान परिषदेत पदवीधर मतदारसंघाच्या ७ जागा आणि शिक्षक मतदार संघाच्या ७ जागा आहे. पदवीधर आणि शिक्षक मतदार संघ मिळून १४ मतदारसंघाच्या बांधणीकडे रिपब्लीकन पक्षाच्या कार्यकर्त्यांनी लक्ष द्यावे.

मुंबईत पदवीधर मतदार नोंदणीकडे लक्ष देऊन १ लाख पदवीधर मतदारांची नोंदणी रिपब्लीकन कार्यकर्त्यांनी करावी, असे आवाहन आज रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय. राज्यमंत्री रामदास आठवले यांनी केले. वानखेडे स्टेडियम येथील गरवारे क्लब मध्ये रिपब्लिकन पक्षाच्या पदवीधर आणि शिक्षक मतदार संघ आघाडीच्या वतीने आयोजित बैठकीत कार्यकर्त्यांना मार्गदर्शन करताना रामदास आठवले बोलत होते.

यावेळी विचार मंचावर ना.रामदास आठवले यांचे सुपुत्र जित आठवले, रिपाइंचे मुंबई अध्यक्ष सिद्धार्थ कासारे, आयोजक पदवीधर आणि शिक्षक आघाडीचे अध्यक्ष घनश्याम चिरणकर, राजीव ठक्कर, राजीव शहा, रिपाइं चे नेते सुरेश बारशिंग, युनायटेड बुद्धिस्ट फेडरेशनचे अध्यक्ष अविनाश कांबळे, सुमित वजाले, रिपब्लिकन बहुजन विद्यार्थी परिषद अध्यक्ष चंद्रशेखर कांबळे असे अनेक मान्यवर उपस्थित होते.

रिपब्लिकन पक्षाने यापूर्वी कधीही पदवीधर मतदारसंघ आणि शिक्षक मतदारसंघाच्या बांधणी बाबत अशी बैठक घेऊन विचार विनिमय केला नाही. याबाबत पहिल्यांदाच पदवीधर मतदार नोंदणीबाबत आणि शिक्षक मतदारसंघा बाबत विचार विनिमय होत आहे.

पदवीधर शिक्षक मतदारसंघ आघाडीचे घनश्याम चिरणकर यांनी याबाबत प्रयत्न करून बैठक आयोजित केल्याचे सांगून, पदवीधर मतदार नोंदणीकडे रिपब्लीकन कार्यकर्त्यानी लक्ष द्यावे. पदवीधर आणि शिक्षक मतदारसंघावर रिपब्लिकन पक्षाचा निळा झेंडा फडकविण्यासाठी कार्यकर्त्यांनी कामाला लागावे असे आवाहन रामदास आठवले यांनी केले.