बुलडाणा - उद्धव बाळासाहेब ठाकरे शिवसेना पक्षाचे प्रमुख उध्दव ठाकरे यांची आज बुलडाणा येथे जाहीर सभा आयोजित करण्यात आली आहे. तर एकनाथ शिंदे यांच्यासह बंडखोर आमदार गुवाहाटी येथे कामाख्या देवीच्या दर्शनासाठी पोहोचले आहेत. यावरून आयोजित सभेत खासदार संजय राऊत यांनी शिंदे गटावर कडाडून टीका केली. (Eknath Shinde news in Marathi)

संजय राऊत यांनी भाषणाची सुरुवातच खोक्यांवरून केली. बुलडाणा जिल्ह्यात सर्वाधिक खोके आल्याचं म्हणत येथे एक फुल दोन हाफ आहेत. अर्थात एक खासदार आणि दोन आमदार बुलडाण्यात आहेत. बुलडाण्यात रेणूका देवीचं मंदीर आहे. महाराष्ट्रातील देवं संपले का असा सवाल उपस्थित करत हे वेडे देवीच्या दर्शनासाठी गुवाहाटीला गेल्याची टीका केली.

यावेळी राऊत यांनी कारागृहात काढलेल्या १०० दिवसांचा उल्लेख केला. राऊत म्हणाले की, मी कारागृहात जाताना माझ्या खांद्यावर भगवा होता. भगवा शेवटच्या श्वासापर्यंत माझ्यासोबत असेल. शिवसेना आणि उद्धव ठाकरे यांच्यासाठी जन्मठेप भोगण्यासाठी मी तयार असल्याचं राऊत यांनी यांनी म्हटलं. यावेळी संजय राऊत यांनी शिंदे गटातील आमदारांना रेडे म्हणून संबोधलं.