मुंबई : वरळी येथील हिट अँड रनप्रकरणी गेल्या दोन दिवसांपासून पोलिसांना गुंगारा देणारा मुख्य आरोपी मिहीर शहा (वय २४) याला मंगळवारी बेड्या ठोकण्यात आल्या. त्याला उद्या (ता.१०) न्यायालयात हजर केले जाणार आहे. पोलिस सहआयुक्त (कायदा व सुव्यवस्था) सत्यनारायण चौधरी यांनी मिहीर याच्या अटकेच्या वृत्तास दुजोरा दिला.

मिहीरसोबत त्याला पळून जाण्यास मदत करणाऱ्या, घरात आसरा देणाऱ्या आणखी ११ ते १२ कुटुंबीय, मित्रमंडळींनाही ताब्यात घेण्यात आल्याची माहिती सूत्रांकडून मिळाली; मात्र त्याबाबत माहिती देण्यास चौधरी यांनी नकार दिला. मिहीर यालाच अटक करण्यात आली आहे असे त्यांनी सांगितले. मिहीरने मंगळवारी सकाळी पश्चिम उपनगरातील एका पोलिस ठाण्यात शरणागती पत्करली अशी माहितीही पुढे येत आहे; मात्र त्यास पोलिसांकडून दुजोरा मिळालेला नाही. दरम्यान, अपघात घडला तेव्हा मिहीरसोबत गाडीत हजर असलेला शहा कुटुंबीयांचा वाहनचालक राजऋषी बिदावत याला मंगळवारी शिवडी येथील दंडाधिकारी न्यायालयाने दोन दिवस पोलिस कोठडीत ठेवण्याचे आदेश दिले होते.

अधिक चौकशीसाठी कोठडी

अपघाताआधी व नंतर घडलेल्या महत्त्वाच्या घडामोडींबाबत तपास करून पुरावे गोळा करायचे आहेत; मात्र बिदावत नेमकी माहिती देत नाही. तसेच तो पोलिसांची दिशाभूल करतो आहे, असा संशय असून त्याला व मिहीरला समोरासमोर बसवून चौकशी करणे क्रमप्राप्त आहे, असा युक्तिवाद पोलिसांनी न्यायालयासमोर केला. तो ग्राह्य धरत न्यायालयाने बिदावत याला ११ जुलैपर्यंत पोलिस कोठडीत ठेवण्याचे आदेश दिले.