मुंबई - Nagpur Floods : नागपूर मध्ये 22 सप्टेंबरच्या रात्री झालेल्या जोरदार पावसामुळे नागपूर शहर पाण्याखाली गेलं होतं. अनेकांच्या घरात पाणी शिरलं होतं. या पुरात तीन मृत्यू झाले. यावरून नागपूरमधील लोक आक्रमक झाले होते. त्यातच उपमुख्यमंत्री देवेंद्र फडणवीस यांनी नागपूरची पाहणी केली. यावेळचा फडणवीस यांचा एक व्हिडीओ सोशल मीडियावर व्हायरल झाला. या व्हिडीओवरून वाद निर्माण झाला असून यावर प्रदेशाध्यक्ष चंद्रशेखर बावनकुळे यांनी प्रतिक्रिया दिली आहे.

फडणवीस यांच्या व्हायरल ऑडियो क्लिपवर चंद्रशेखर बावनकुळे यांनी म्हटलं की, त्या व्हिडीओचा विपर्यास केला गेला. जनतेमध्ये नितीन गडकरी आणि देवेंद्र फडणवीस यांच्याबद्दल आदर आहे. मागच्या दहा वर्षांत जे नागपूर बदललं, ते कधीच बदललं नाही.

ज्यांनी नागपूर करता एक रुपयाचा विकास केला नाही, ते बोलत असल्याचं त्यांनी सांगितलं. तसेच देवेंद्र फडणवीस पूरग्रस्तांच्या घरी गेले. त्यांच्या घराची तपासणी केली. घरात पाणी घुसल्यावर आक्रोश तर राहणारचं, असंही बावनकुळे यांनी नमूद केलं.

फडणवीस नागपूरमध्ये पुरग्रस्त भागाची पाहणी करत असताना काही स्थानिक लोक आक्रमक झाले होते. त्यांनी फडणवीस यांचा ताफा अडवला होता. यावेळा एका व्यक्तीच्या हाताला धरून फडणवीस आपल्याकडे ओढताना दिसत आहेत. त्यावरून विरोधकांनी फडणवीसांवर जोरदार टीका केली होती.