मुंबई- महाराष्ट्र भाजपने ट्विट केलेल्या व्हिडिओमध्ये राजकीय वर्तुळात खळबळ उडाली आहे. या व्हिडिओमध्ये देवेंद्र फडणवीस मी पुन्हा येईन, असं म्हणताना दिसत आहेत. त्यामुळे देवेंद्र फडणवीस पुन्हा मुख्यमंत्री होतील का? अशा चर्चा सुरु झाल्या आहेत. यावर मुख्यमंत्री एकनाथ शिंदे यांनी साम टीव्हीला प्रतिक्रिया दिली आहे. मी हा व्हिडिओ पाहिलेला नाही, असं ते म्हणाले आहेत.

एकनाथ शिंदे यांनी व्हिडिओ पाहिला नाही, असं म्हणत सावध भूमिका घेतली आहे. शिंदे गटाच्या नेत्यांनीही यावर प्रतिक्रिया दिली आहे. भाजपने असा व्हिडिओ का ट्विट केला हे त्यांच्या नेत्यांना विचारावे लागेल, असं मंत्री उदय सामंत म्हणाले. भाजपचे नेते प्रविण दरेकर यांनी म्हटलं, की एका ट्विटवरुन काहीही संकेत दिले जात नाहीत. यातून कोणताही संदेश देण्यात आलेला नाही.

विरोधकांकडूनही या व्हिडिओवर प्रतिक्रिया येऊ लागल्या आहेत. माजी मुख्यमंत्री पृथ्वीराज चव्हाण म्हणाले की, पंतप्रधान मोदी हे राज्यामध्ये आले होते. मुख्यमंत्री एकनाथ शिंदे आणि देवेंद्र फडणवीस दोन दिवसांपूर्वी दिल्लीला गेले होते. त्यामुळे त्यांच्या भेटीमध्ये काही चर्चा झाली असेल. त्यामुळे भाजपकडून असा व्हिडिओ ट्विट करण्यात आला असावा. (Latest Marathi News)