मुंबई : राज्यात नवं सरकार सत्तेत आल्यानंतर विधानसभा अध्यक्षपदाची निवडणूक आणि बहुमत चाचणीचा कार्यक्रम जाहीर झाला आहे. पण यांपैकी विधानसभा अध्यक्षपदाच्या निवडणुकीवर आता काँग्रेसनं आक्षेप घेतला आहे. हे प्रकरण न्यायप्रविष्ठ असताना हा कार्यक्रम मांडलाच कसा? असा सवाल करताना काँग्रेसनं विधिमंडळाच्या प्रधान सचिवांना पत्र लिहिलं आहे. (Congress objects to Assembly Speakers election in Maharashtra Legislature)

काँग्रेस प्रदेशाध्यक्ष नाना पटोले म्हणाले, "महाविकास आघाडी म्हणून आम्ही विधानसभा अध्यक्षपदासाठी अर्ज भरणार आहोत. गरज पडल्यास आम्ही तीन अर्जही दाखल करु. पण याबाबत अद्याप अंतिम निर्णय झालेला नाही. पण अर्ज मागे घेण्याच्या दिवसापर्यंत परिस्थिती स्पष्ट होईल. पण खरंतर यामध्ये एक मुद्दा उपस्थित होतो की, यापूर्वी राज्यपालांनी हे प्रकरण न्यायप्रविष्ठ असल्यानं निवडणूक घेता येणार नाही, असं पत्र महाविकास आघाडी सरकारला दिलं होतं. मग आता ते कोणत्या आधारे ही निवडणूक घेत आहेत?"

रोज संविधानिक व्यवस्थेचा खून करण्याच काम भाजप श्रेष्ठींकडून केलं जात आहे. ही चिंतेची बाब आहे. सत्ता कोणाची आहे, कोणाची नाही हे महत्वाचं नाही. पण अशा प्रकारे संविधानिक व्यवस्थेवर हल्ले होणं ही चिंतेची बाब आहे. लोकशाही आणि संविधानिक व्यवस्था जिवंत ठेवणं हीच लोकप्रतिनिधींची आणि सरकारची जबाबदारी असते, असंही नाना पटोले यांनी म्हटलं आहे.