तात्या लांडगे

सोलापूर : राष्ट्रीय शैक्षणिक धोरणातील त्रिभाषा सूत्रानुसार विद्यार्थ्यांना मराठी, इंग्रजीनंतर एका तिसऱ्या भाषेतून शिक्षण घेण्याचे बंधन घालण्यात आले आहे. पण, कन्नड, तेलुगु, तमीळ, उर्दू, गुजराती अशा अन्य भाषांचे शिक्षक शालेय शिक्षण विभागाकडे पुरेशा प्रमाणात उपलब्ध नाहीत. त्यामुळे २० पेक्षा कमी विद्यार्थी असलेल्या भाषेचे शिक्षण विद्यार्थ्यांना बालभारतीच्या माध्यमातून व्हिडिओच्या माध्यमातून ऑनलाइन दिले जाणार आहे.

तिसऱ्या भाषेवरून सध्या राजकारण सुरू झाले आहे; पण १६ जूनपासून शाळा सुरू होऊनही विद्यार्थ्यांना अद्याप तिसरी भाषा निवडता आली नसून, त्यांना त्या भाषेची पुस्तके देखील उपलब्ध झालेली नाहीत. शिक्षणमंत्री दादा भुसे यांनी आज (गुरुवारी) शिक्षण आयुक्त, शिक्षण संचालकांची बैठक घेतली. त्यात हिंदीची सक्ती करू नये, अशा सूचना त्यांनी केल्या आहेत. पण, हिंदीशिवाय अन्य भाषा निवडल्यानंतर त्या भाषा शिकविण्यासाठी शिक्षक आणायचे कोठून, हा प्रश्न अधिकाऱ्यांसमोर आहे. पहिल्या वर्षी कन्नड भाषा निवडली आणि दुसऱ्या वर्षात त्या विद्यार्थ्याला दुसरी भाषा घ्यायची असल्यास त्याला घेता येईल का, याबाबतही संभ्रम कायम आहे. २३ जूनपूर्वी त्यासंदर्भातील निर्णय घेतला जाईल, कारण त्यावेळी राज्यातील सर्वच शाळा सुरू होणार असल्याचे वरिष्ठ अधिकाऱ्यांनी सांगितले.

आज शालेय शिक्षण विभागाच्या संचालकांची बैठक

राज्य अभ्यासक्रम आराखड्यानुसार मराठी व इंग्रजी माध्यमाच्या शाळांमध्ये इयत्ता पहिली ते पाचवीच्या विद्यार्थ्यांसाठी हिंदी ही सर्वसाधारण तृतीय भाषा असेल, पण त्याऐवजी अन्य भाषा शिकायची इच्छा असलेले विद्यार्थ्यांना ती भाषा निवडता येणार आहे. हिंदी भाषेची कोणतीही सक्ती केलेली नाही. उद्या (शुक्रवारी) सर्व शिक्षण संचालकांची बैठक घेऊन त्यावेळी विद्यार्थ्यांनी तिसरी भाषा कशी निवडावी, त्याची कार्यवाही कशी केली जाणार, अशा मुद्द्यांवर चर्चा होईल.

- सचिंद्र प्रताप सिंह, शिक्षण आयुक्त

कंत्राटी शिक्षकांची होणार नेमणूक

हिंदीशिवाय अन्य तिसरी भाषा निवडलेल्या विद्यार्थ्यांची संख्या २० पेक्षा जास्त असल्यास त्यासाठी त्या विषयाचा शिक्षक शालेय शिक्षण विभागाकडे उपलब्ध असल्याची खात्री केली जाणार आहे. जर त्या विषयाचे शिक्षक विद्यार्थ्यांना शिकविण्यासाठी उपलब्ध नसल्यास कंत्राटी तत्त्वावर त्या विषयाच्या (माध्यम) शिक्षकांची नेमणूक करावी लागणार असून, तशी तयारी शिक्षण विभागाची आहे. सध्या शालेय शिक्षण विभागाकडे तमीळ, तेलुगु, उर्दू, कन्नड माध्यमातून डी.एड.- बी.एड. झालेल्या शिक्षकांची संख्या अत्यल्प आहे.