मुंबई - "संपूर्ण महाराष्ट्र गंभीर दुष्काळाने होरपळून निघाला असताना सरकार दुष्काळ जाहीर करण्यास विलंब करीत असून, दुष्काळाऐवजी दुष्काळसदृश परिस्थिती जाहीर करणे हे शेतकऱ्यांचे शोषण आहे. फडणवीसांच्या राज्यात "दुष्काळ सदृश आणि राजा अदृश्‍य' असे दुर्दैवी चित्र निर्माण झाले आहे,' अशी टीका विधानसभेतील विरोधी पक्षनेते राधाकृष्ण विखे पाटील यांनी आज केली. 

विखे पाटील यांनी आज मुंबईत पत्रकारांशी संवाद साधताना दुष्काळाच्या मुद्यावरून सरकारवर हल्लाबोल केला. ते म्हणाले, की राज्यभरातील गंभीर दुष्काळी परिस्थिती पाहता सरकारने थेट दुष्काळच जाहीर करून तातडीने उपाययोजनांना सुरवात करणे अपेक्षित होते. पण भाजप-शिवसेनेच्या या सरकारला अटी आणि निकषांचा "व्हायरस' लागला आहे. हा "व्हायरस' प्रत्येक संकटात शेतकऱ्यांचे रक्त शोषतो आहे. अन्यायकारक, अनावश्‍यक अटी व निकषांची पूर्तता झाल्याशिवाय हे सरकार शेतकऱ्यांना कोणतीही मदत देऊ शकत नाही, हे पुन्हा एकदा सिद्ध झाल्याचा आरोप विखे यांनी केला. 

फडणवीस सरकारने ज्या मराठवाड्यात जलयुक्त शिवारच्या अफाट यशाचे ढोल बडवले, त्याच मराठवाड्यातील अनेक तालुक्‍यांमध्ये आज पाण्याची परिस्थिती गंभीर झाली आहे. जलयुक्त शिवार योजना विरोधकांना कळलीच नसल्याचे मुख्यमंत्री म्हणतात. आमची हयात शेतीत गेली आणि ज्यांनी आजवर शेती केवळ सिनेमाच्या पडद्यावर पाहिली, ते लोक आता आम्हाला शेतीच्या योजना शिकवणार का, असा बोचरा प्रश्न विखे पाटील यांनी उपस्थित केला.