२०,६३० मेगावॉटचा पुरवठा; ९५० मेगावॉटचे भारनियमन
नागपूर - ऑक्‍टोबर हिटच्या तडाख्यामुळे राज्यात विजेच्या मागणीने विक्रमी उच्चांक गाठला आहे. सोमवारी २४ हजार ९६२ मेगावॉट विजेची मागणी नोंदविण्यात आली. आजवर एकाच निवशी नोंदविलेली ही सर्वाधिक मागणी ठरली आहे. महावितरणने २० हजार ६३० मेगावॉटचा पुरवठा केला. मात्र, पुरेशी वीज उलब्ध नसल्याने ९५० मेगावॉट विजेचे भारनियमन करावे लागले.

ऑक्‍टोबर हिट त्यात शेतीला पाणी देण्यासाठी विजेच्या मागणीत वाढ झाली आहे. परिणामी उन्हाळ्यातील मागणीपेक्षाही ऑक्‍टोबर महिन्यात विजेची अधिक मागणी नोंदविण्यात येत आहे. राज्यात १६ ऑक्‍टोबरला २४ हजार ९२२ मेगावॉटची मागणी नोंदविली गेली. यात महावितरणच्या भागात २१ हजार ५४२ मेगावॉट, १७ ऑक्‍टोबरला २४ हजार ६८७ मेगावॉट, त्यातील महावितरणच्या भागात २१,२२३ मेगावॉट विजेची मागणी होती. सोमवारी मुंबई वगळता उर्वरित महाराष्ट्रात २१,५८० मेगावॉट विजेची मागणी होती.

विजेची मागणी एकदम वाढल्यामुळे महावितरणने नियोजन करीत २० हजार ६३० मेगावॅट विजेचा पुरवठा करीत ग्राहकांना दिलासा देण्याचा प्रयत्न केला. उपलब्ध विजेपेक्षा मागणी अधिक असल्याने जी-१ ते जी-३ गटातील वाहिन्यांवर ९५० मेगावॉट विजेचे भारनियमन करण्यात आले. महापारेषणने सोमवारी राज्यात एकूण २४ हजार १२ मेगावॉटवीज पारेषित केल्याची नोंद झाली.