मुंबई - महाविकास आघाडीच्या नेत्यांची महामंडळ वाटपासंदर्भातील बैठक बरोबर वर्षभरानंतर पुन्हा एकदा पार पडली आणि पुन्हा एकदा १५ दिवसांत महामंडळ वाटप केले जाणार असल्याचे आश्वासन आघाडीच्या नेत्यांनी दिला आहे. यात शिर्डी साईबाबा संस्थान अध्यक्षपद राष्ट्रवादी काँग्रेसला तर विठ्ठल रुक्मिणी देवस्थान पंढरपूर काँग्रेसच्या पारड्यात जाण्यावर सहमती झाल्याचे समजते. सिडको काँग्रेसकडे, ‘म्हाडा’ शिवसेनेकडे आणि महिला आयोग ‘राष्ट्रवादी’ला देण्यावरही सहमती झाल्याचे समजते.

सर्व महामंडळांचे वाटप सहमतीने झालेले असून त्यावर अंतिम निर्णय मुख्यमंत्री येत्या १५ दिवसांत घेतील, असे महाविकास आघाडीतील शिवसेनेचे नेते आणि नगरविकास मंत्री एकनाथ शिंदे यांनी मंगळवारी या बैठकीनंतर सांगितले. सह्याद्री अतिथिगृहात आज महाविकास आघाडीची बैठक पार पडली. सत्तेत असूनही मंत्रिपदापासून वंचित राहणाऱ्यांना शांत करण्यासाठी महामंडळाचे मधाचे बोट लावले जाते. यावेळी मात्र महाविकास आघाडीतील असंतुष्टांसाठी भाजप गळ टाकून बसलेली असल्याने त्यांच्या मनधरणीसाठी त्यांची वर्णी महामंडळांवर लावण्याबाबत शिवसेना गंभीर आहे.

महाविकास आघाडीत डावलले जात असल्याची भावना काँग्रेसची असल्याने आणि मंत्रिपदात त्यांना वाटाही अल्प मिळाल्याने महामंडळांचे वाटप लवकरात लवकर व्हावे, असा काँग्रेसचाही महाविकास आघाडीवर दबाव आहे. बैठकीला अजित पवार, नगरविकास मंत्री एकनाथ शिंदे, उद्योग मंत्री सुभाष देसाई, काँग्रेसचे प्रदेशाध्यक्ष नाना पटोले, अशोक चव्हाण, बाळासाहेब थोरात आदी उपस्थित होते.

काँग्रेसमध्ये नाराज

मंत्रिपद आणि सदस्य संख्येच्या आधारे महामंडळ वाटप केले जाणार असल्याचे एकनाथ शिंदे यांनी सांगितले तर महामंडळाचे वाटप तिन्ही पक्षात समसमान होईल, असा दावा नाना पटोले यांनी केल्याने महामंडळाच्या वाटपावरून काँग्रेस नाराज असल्याचे समजते.