पुणे: पुढच्या आठवड्यात मुख्यमंत्री उद्धव ठाकरे आणि उपमुख्यमंत्री अजित पवार राज्यपालांना भेटणार आहेत. या चर्चेत ते मागील अनेक दिवसांपासून प्रलंबित असणारा प्रश्न म्हणजे राज्यपाल नियुक्त १२ आमदारांच्या मुद्द्यावर चर्चा करणार आहेत. राज्यपालांनी विधानपरिषदेतील १२ आमदारांच्या विषयावर चर्चेसाठी बोलावले असल्याची माहिती उपमुख्यमंत्री अजित पवार यांनी पुण्यामध्ये पत्रकार परिषदेत दिली आहे.

अखेर १२ आमदारांच्या नियक्तीचा तिढा सुटणार असल्याची चिन्हे दिसत आहेत. आता या विषयावर राज्य सरकारमधील नेते राज्यपाल भगतसिंह कोश्यारींशी चर्चा करणार आहेत. पुढच्या आठवड्यात राज्यपालांची वेळ घेऊन प्रलंबित असणाऱ्या १२ आमदारांच्या नियुक्तीबाबत चर्चा करणार असल्याचे उपमुख्यमंत्री अजित पवार यांनी सांगितले.

नेमका वाद काय आहे?

विधानपरिषदेत राज्यपाल विषेश अधिकार वापरून १२ आमदारांच्या नियुक्ती करत असतात. पण यासाठी राज्य सरकारचा त्यासाठी नावांसह प्रस्ताव आला पाहिजे. त्या मुद्द्यावरूनच राज्यपाल आणि राज्य सरकारमध्ये मागील अनेक दिवसांपासून वाद सूरू आहे.