सोलापूर : रुग्णालयाची उभारणी ज्यांनी केली, ज्यांनी दवाखाना नावारूपाला आणला, त्या डॉ. शिरीष वळसंगकर यांच्या हाती सध्या फक्त ‘ओपीडी’चेच अधिकार होते. ओळखीतील रुग्णाचं थोडं बिल कमी करण्यास डॉ. शिरीष यांनी सांगितले, तरीदेखील बिल कमी केले जात नव्हते. त्यांचे रुग्णालयातील अधिकार कमी केले होते, त्यांच्या शब्दाला किंमत राहिली नव्हती, अशी माहिती अटकेतील मनीषा यांनी पोलिसांना दिल्याचे सूत्रांनी सांगितले.

डॉ. शिरीष यांची सून न्यूरोसर्जन असल्याने रुग्णालयात त्यांच्याकडेच अधिक रुग्ण असायचे. त्यांचे शिक्षणही जास्त होते. दुसरीकडे डॉ. अश्विन यांचे रुग्ण स्वतंत्र होते. प्रत्येकजण त्यांच्या त्यांच्या रुग्णांचे बिल स्वतंत्रपणेच घ्यायचे. माझ्याकडे केवळ वेल्फेअरसंदर्भातील निर्णय असायचे. रुग्णालयास काही वस्तू आवश्यक असल्यास डॉ. शिरीष यांच्या स्वाक्षरीने त्या वस्तू मागवीत होते, असेही मनीषा सांगत होती. रुग्णालयातील निम्मे अधिकार सुनेला देऊनही त्यांना डॉ. शिरीष वळसंगकर यांची हस्तक्षेप त्यांना मान्य नव्हता. अलीकडच्या काही दिवसात सून व मुलांमधील अंतर्गत वादामुळे रुग्णालयावर परिणाम होऊ नये, तोटा होऊ नये, रुग्ण कमी होऊ नयेत म्हणून मोठ्या डॉक्टरांचे रुग्णालयात येणे-जाणे वाढले होते. पण, त्यांचा हस्तक्षेप दोघांनाही आवडत नव्हता. काही महिने वेगवेगळे राहिलेले डॉ. अश्‍विन व डॉ. शोनाली काही दिवसांपूर्वी एकत्र आले होते, असेही मनीषा म्हणाल्याचे पोलिस सूत्रांनी सांगितले.

पाच दिवसांच्या पोलिस कोठडीत मनीषाने याच बाबी सतत पोलिसांना सांगितल्या. दरम्यान, आता डॉक्टरांच्या कॉल डिटेल्समधून (सीडीआर) काहीतरी धागेदोरे हाती लागतील, अशी पोलिसांना आशा आहे. दुसरीकडे सुसाईड नोटवरील हस्ताक्षर, स्वाक्षरी देखील खूप महत्त्वाची ठरणार आहे. त्यातून डॉ. शिरीष यांच्या आत्महत्येला अटकेतील मनीषा की अन्य कोणी कारणीभूत आहे हे स्पष्ट होणार आहे.

सुसाईड नोट हस्ताक्षर तज्ज्ञांकडे...

डॉ. शिरीष वळसंगकर यांच्या खिशात सापडलेली सुसाईड नोट त्यांच्याच हस्ताक्षरातील आहे का?, याच्या पडताळणीसाठी पोलिसांनी गुरुवारी (ता. २४) रुग्णालयातून डॉक्टरांचे हस्ताक्षर व स्वाक्षरी असलेली काही कागदपत्रे ताब्यात घेतली आहेत. त्यावरील हस्ताक्षर एकच आहे का?, या पडताळणीसाठी कागदपत्रे हस्ताक्षर तज्ज्ञांकडे पाठविण्यात आली आहेत. त्याचा रिपोर्ट पुढील आठवड्यात मिळेल, असे पोलिसांनी सांगितले.

पोलिसांकडे एप्रिलचे कॉल डिटेल्स; पडताळणीसाठी दोन अंमलदार

पोलिसांनी डॉ. शिरीष यांनी १ ते १७ एप्रिल या काळात नेमके कोणाकोणाला कॉल केले, त्यांना कोणाचे कॉल आले, त्यांनी सतत कोणाला कॉल केले किंवा कोणाचे आले, अनोळखी क्रमांकावरून कोणाचे कॉल आले होते का?, याची माहिती घेतली आहे. याशिवाय मनीषाने स्वत:च्या मोबाईलवरून डॉक्टरांना महिनाभरात किती कॉल केले, त्यांनी इतर कोणाला या काळात कॉल केले, याचाही डेटा पोलिसांनी मिळविला आहे. डॉक्टरांचे घर आणि दवाखान्यातील ३० दिवसांचे सीसीटीव्ही फुटेजही घेतले असून त्यात विशेषत: डॉक्टरांना त्यांच्या घरी कोण-कोण भेटायला आले होते, याची पडताळणी केली जात आहे. त्याची जबाबदारी स्वतंत्र दोन अंमलदारांवर सोपविली आहे.

रुग्णालयात फाडलेल्या ई-मेलचे तुकडे मिळालेच नाहीत

१७ एप्रिल रोजी डॉ. शिरीष वळसंगकर, त्यांची पत्नी डॉ. उमा व मुलगा डॉ. अश्विन यांच्यासमोर मनीषा मुसळे माने यांनी ई-मेलची मूळ प्रत रुग्णालयातच फाडून टाकली होती. त्याचे तुकडे शोधून जप्त करायचे असल्याने तिला पोलिस कोठडी मिळावी, असे पोलिसांनी न्यायालयासमोर सांगितले होते. पण, दवाखान्यातून ते तुकडे गायब झाले असून पोलिसांना तपासानंतरही ते मिळाले नाहीत हे विशेष. मनीषा यांनी संगणकावर टाईप केलेला मजकूर प्रिंट काढून ई-मेलद्वारे तिघांना पाठविला होता.