मुंबईः राज्य सरकारने मागास प्रवर्गातील उमेदवारांना मोठा दिलासा दिला असून प्रवेशाच्या वेळी शैक्षणिक शुल्क न घेण्याचे आदेश जारी केले आहेत.

ईडब्ल्यूएस, ईबीसी, ओबीसी प्रवर्गातील उमेदवारांना शैक्षणिक फीमध्ये सवलत मिळणार आहे. त्यामुळेच राज्य सरकारनेविद्यार्थ्यांकडून फी न घेण्याचे आदेश काढले आहेत. 'साम टीव्ही'ने हे वृत्त दिले आहे.

आर्थिकदृष्ट्या मागास (EBC), आर्थिकदृष्ट्या दुर्बल घटक (EWS), सामाजिक व शैक्षणिकदृष्ट्या मागास प्रवर्ग (SEBC) व इतर मागासवर्ग (OBC) प्रवर्गातील पात्र विद्यार्थी व विद्यार्थीनींकडून प्रवेशाच्यावेळी शिक्षण शुल्काची रक्कम शैक्षणिक संस्थांनी न घेणेबाबत आदेश सरकारने जारी केले आहेत.

राज्य सरकारच्या या निर्णयामुळे मागास प्रवर्गातील उमेदवारांना मोठा दिलासा मिळाला आहे. एकीकडे राज्य सरकारकडून मराठा समाजासाठी सगेसोयरे अधिसूचनेची अंमलबजावणी करण्याच्या हालचाली सुरु आहेत. तर दुसरीकडे मराठा समाजासाठी सवलती देण्याचाही सपाटा सुरु आहे. परंतु आंदोलक मात्र ओबीसीतून मिळणाऱ्या आरक्षणावर ठाम आहेत.