नंदुरबारचे माजी खासदार आणि माजी केंद्रीय मंत्री माणिकराव गावित यांचे आज निधन झाले. त्यांचे पुत्र भरत गावित यांनी ट्विटरवरुन त्यांच्या निधनाची बातमी दिली. वयाच्या ८८ व्या वर्षी त्यांनी अखेरचा श्वास घेतला आहे.

(Former MP Manikrav Gavit Death)

नंदुरबार जिल्ह्यातील धुडीपाडा येथे माणिकराव गावित यांचा जन्म २९ ऑक्टोबर १९३४ ला झाला. माणिकराव गावित हे नंदुरबार जिल्ह्यातील सलग ३० वर्षे खासदार राहिलेले पहिले नेते आहेत. १९८० च्या लोकसभा निवडणुकीपासून ते २००९ पर्यंत ते नंदुरबारचे खासदार राहिले. सलग ९ वेळा लोकसभेवर निवडून येण्याचा विक्रम त्यांच्या नावे आहे. तसेच आपल्या पक्षाकडून सलग दहाव्यांदा तिकीट मिळवणाऱ्या जेष्ठ नेत्यांच्या यादीत त्यांचा नंबर लागतो. त्यामुळे त्यांचे काँग्रेस पक्षात अनन्यसाधारण महत्त्व आहे.

आपल्या कार्यकर्त्यांमध्ये दादासाहेब या नावाने प्रसिद्ध असलेल्या माणिकराव गावित यांना मनमोहन सिंग यांचे सरकार आल्यावर पहिल्यांदा मंत्रिपद मिळालं. विशेष म्हणजे आपल्याला मंत्रिपद मिळाल्याचं त्यांना टीव्हीवरून कळालं होतं. केंद्रीय मंत्री झाले तरी त्यांची साधी राहणी सामान्य माणसाला भोवणारी होती.

त्यांचे मंत्रिपद गेल्यावर मतदारसंघात एक कार्यक्रम आयोजित केला होता. त्यावेळी ते एका शासकीय विश्रामगृहात थांबले असताना त्यांची गैरसोय झाली होती. त्यामुळे विश्रामगृहाच्या अधिकाऱ्याला निलंबित करण्यात आले होते. त्याबरोबर आपले मंत्रिपद गेल्यावरही ते दु:खी नव्हते.