मुंबई : गडचिरोली जिल्ह्यातील भूसुरुंग स्फोटाच्या प्रकरणात राष्ट्रीय तपास संस्थेने (एनआयए) अटकेत असलेले आठ आरोपी व चार संशयित आरोपींच्या विरोधात बुधवारी (ता. 5) विशेष न्यायालयात आरोपपत्र दाखल केले. नक्षलवाद्यांनी दादापूर येथे 1 मे रोजी घडवलेल्या भूसुरुंगाच्या स्फोटात 15 जवान हुतात्मा झाले आणि एका खासगी वाहनचालकाचा मृत्यू झाला.

गडचिरोली भूसुरुंग स्फोट प्रकरणात एनआयएने निर्मला उप्पुगंटी, सत्यनारायणा राणी, दिलीप हिदामी, परसराम तुलावी, सोमसाय मडवी, किरण हिदानी, सुखरू गोटा, कैलास रामचंदानी या अटक झालेल्या आरोपींच्या विरोधात गुरुवारी आरोपपत्र दाखल केले. या आरोपपत्रात मालोजुला वेणुगोपाळ, सतीश मोहाडा, दुर्गेश वट्टी व शिवराम गोटा या संशयित आरोपींचा समावेश आहे.

एनआयएने 25 जूनला गुन्हा दाखल केला होता. 
गडचिरोलीतील कुरखेडा तालुक्‍यातील दादापूर (रामगड) येथे सुमारे 150 सशस्त्र नक्षलवाद्यांनी राष्ट्रीय महामार्गाच्या कामासाठी वापरली जाणारी 36 वाहने, यंत्रसामग्री आणि कार्यालयांची जाळपोळ केली. त्यानंतर 1 मे रोजी सकाळी 11.30 च्या सुमारास शीघ्र कृती दलाचे जवान येरंडी येथील गाहाने याचे खासगी वाहन भाड्याने घेऊन कुरखेडा येथून कोरचीच्या दिशेने निघाले. त्या वेळी कुरखेड्यापासून सहा किलोमीटर अंतरावरील जांभूळखेडा गावाच्या अलीकडील एका छोट्या पुलावर नक्षलवाद्यांनी शक्तिशाली भूसुरुंगाचा स्फोट घडवला. या स्फोटात वाहनचालकासह 15 जवान हुतात्मा झाले. 

पाऊण तास चकमक सुरू 
या हल्ल्याची माहिती मिळताच कुरखेडा आणि पुराडा पोलिसांची पथके तत्काळ घटनास्थळी पोहोचली. परिसरातच दबा धरून बसलेल्या नक्षलवाद्यांनी पोलिसांवर गोळीबार सुरू केला. पोलिसांनी नक्षलवाद्यांना जोरदार प्रत्युत्तर दिले. ही चकमक तब्बल 45 मिनिटे सुरू होती. पोलिसांपुढे टिकाव लागणार नाही, असे लक्षात आल्याने नक्षलवादी जंगलाच्या दिशेने पळून गेले होते.