वैद्यकीय प्रवेशासाठी आवश्यक असणारी नीट परीक्षा यावर्षी 12 सप्टेंबरला पार पडली. काही ठिकाणी या परीक्षेसाठी आलेल्या विद्यार्थ्यांना गैरसोयीचा सामना करावा लागला. सोलापूरमध्येही असाच प्रकार समोर आला. हे प्रकरण थेट न्यायालयात गेलं आणि दोन विद्यार्थ्यांसाठी परीक्षा पुन्हा घेण्याचा आदेश हायकोर्टाने दिला आहे.

सोलापुरातील नीट परीक्षा केंद्रावर पर्यवेक्षकाच्या चुकीमुळे घडलेल्या प्रकारात न्यायालयाने विद्यार्थ्यांच्या बाजूने निकाल दिला. या दोन्ही उमेदवारांचे शैक्षणिक नुकसान झाले. त्यामुळे पर्यवेक्षकाच्या चुकीमुळे दोन उमेदवारांसाठी 'नीट' परीक्षा पुन्हा घ्या, असं कोर्टाने म्हटलंय.

वैष्णवी भोपळे आणि अभिषेक कापसे या दोन उमेदवारांनी रिट पिटिशन दाखल करून आपली कैफियत मांडली होती. यावर अंतिम सुनावणीवेळी न्यायमूर्ती रमेश धनुका व न्या. अभय अहुजा यांच्या खंडपीठाने दोन्ही उमेदवारांच्या बाजूने निर्णय जाहीर केला. या दोन्ही उमेदवारांची 'नीट' परीक्षा पुन्हा घेऊन दोन आठवड्यांत निकाल जाहीर करावा, असे खंडपीठाने आदेशात जाहीर केले आहे.

याचिकाकर्त्या उमेदवारांना परीक्षेस पुन्हा बसू देण्याचा निर्णय प्रशासनाला घेता येणार नाही अशी भूमिक एनटीएने घेतली होती. प्रशासनाच्या चुकीमुळे या उमेदवारांचे नुकसान होऊ नये, असे निरीक्षण नोंदवत हा आदेश इतरांसाठी पायंडा म्हणून गृहित धरला जाऊ नये, असं स्पष्ट आदेश खंडपीठाने एनटीएला दिला आहे.

परीक्षा केंद्रावर प्रश्न आणि उत्तर पत्रिकांच्या संच वाटणीत गोंधळ झाल्याचं दोन्ही उमेदवारांनी पर्यवेक्षकांना सांगितलं. मात्र, त्याने दुर्लक्ष केलं. सोलापूर जिल्हाधिकारी व संबंधितांनाही ईमेलद्वारे तक्रार केली. अखेर शाळेने आपल्या चुकीची कबूली दिली आहे.