महाराष्ट्रातील (Maharashtra) कोरोना (Corona) रुग्णांची संख्या दिवसेंदिवस वाढत चालली आहे. यातच ओमिक्रॉनच्या (Omicron) रुग्णांची संख्या दिल्लीनंतर महाराष्ट्रात सर्वाधिक आहेत. याशिवाय आता थर्टी फर्स्ट आणि न्यू इयरच्या पार्श्वभूमीवर राज्यात काही निर्बंध आहेत. दरम्यान, राज्याचे उपमुख्यमंत्री अजित पवार (Ajit Pawar) यांनी राज्यातील निर्बंध आणखी कडक होण्याचे संकेत दिले आहेत. आज दुपारी साडेतीन वाजता मुख्यमंत्री टास्क फोर्ससोबत बैठक घेणार आहेत. अजित पवार पुण्यात जिल्हा बँकेच्या प्रचार मेळाव्यानंतर बोलताना कोरोनाचा धोका वाढल्यास निर्बंध लावावेच लागतील असं ते म्हणाले.

अजित पवार यांनी सांगितलं की, ओमिक्रॉनची तीव्रता सौम्य असली तरी खबरदारी घ्यायची गरज आहे. सभागृहातही पोटतिडकीने सांगतो की मास्क लावा. तरीही कार्यकर्त्यांकडून कार्यक्रमाला बोलावलं जातं. शिवाय जे लोक नियम पाळत नाहीत त्यांनाही सांगतो की, आता वर्ष संपतंय, कोरोना वाढतोय. त्यानिमित्त होणाऱ्या पार्ट्या या वेगळ्या स्वरुपाच्या असतात. लोक मोठ्या प्रमाणावर एकत्र आल्यानं संसर्ग होतोय. यावेळी होणारा संसर्ग वेगाने होत आहे. त्यामुळे प्रत्येकाने काळजी घेणं गरजेचं असल्याचंही अजित पवार यांनी म्हटलं.

राजकीय नेत्यांकडून कार्यक्रमात गर्दी होते का याबद्दल विचारंल असता ते म्हणाले की, राजकीय नेते गर्दी करतात असं नाही. कार्यकर्त्यांकडून निमंत्रण दिलं जातं. ते एकदा तरी येऊन जा असं म्हटलं जातं. कार्यकर्ते म्हणतात आम्ही गर्दी करत नाही पण प्रत्यक्षात वेगळंच चित्र असतं. एकदा, दोनदा झालं की तिसऱ्या वेळी आम्ही बंधनं घालून घेतली तर पुन्हा हेच घरात बसले अशी बातमी येते. कोरोनाच्या बाबतीत असणारे नियम सर्वांनी पाळले पाहिजेत अशी भूमिका आम्ही सर्वांना सांगायला हवी आणि आम्हीही त्याचे पालन केले पाहिजे असं सांगत नेत्यांनीही खबरदारी घ्यावी असं आवाहन अजित पवार यांनी केलं.