औरंगाबाद: देशात कोरोनाची दुसऱ्या लाटेत मोठी जिवीतहाणी झाली आहे. तसेच देशात दुसऱया लाटेत आतापर्यंत ४२० डॉक्टारांना जीव गमवावा लागल्याची माहिती इंडियन मेडिकल असोसिएशनने दिली आहे. कोरोनाची दुसरी लाट सुरु असताना तौक्ते वादळाने देशाच्या पश्चिम किनाऱ्यावर मोठे नुकसान केले आहे.

शुक्रवारी पंतप्रधान नरेंद्र मोदी कोरोनाची आढावा बैठक घेत असताना भावूक झाले होते. यावर औरंगाबादचे खासदार इम्तियाज जलील यांनी ट्विट करत मोदींचे नाव घेता टोला लगावला आहे. 'मला नेहमी वाटायचं की दिलीप कुमारांपेक्षा चांगला भावनिक अभिनय कोणीच करू शकत नाही, पण मी चूक होतो', अशी खोचक टीका खा. जलील यांनी ट्विटमधून पंतप्रधान मोदींवर केली आहे.

मागील काही दिवसांपासून कोरोना प्रादुर्भावाच्या पार्श्वभूमीवर पंतप्रधान मोदी देशातील जिल्हाधिकाऱ्याशी संवाद साधत आहेत. तसेच डॉक्टर्स, पॅरामेडिकल स्टाफ आणि फ्रंटलाईन वर्कर्ससोबतही मोदी चर्चा करत आहेत. काल वाराणसीतील जिल्हाधिकारी आणि आरोग्य विभागातील कर्मचाऱ्यांशी संवाद साधला होता. या दरम्यान, कोरोनामुळे झालेल्या जिवीतहाणीबद्दल बोलताना मोदी भावूक झाले होते.