मुंबई: ओमिक्रॉनची वाढती रुग्णसंख्या पाहता महाराष्ट्रातील सरकार अलर्टवर आहे. यासंदर्भातच राज्य सरकार आणि टास्क फोर्समध्ये आज बैठक झाली आहे. याबाबत माहिती देताना आरोग्यमंत्री राजेश टोपे यांनी म्हटलंय की, राज्यातील वाढती ओमिक्रोनची रूग्णसंख्या लक्षा घेता लहान मुलांच्या लसीकरण सुरू करण्यासंदर्भात आणि बूस्टर डोसबाबत केंद्राकडे आग्रह धरणार आहे, अशी माहिती राज्याचे आरोग्य मंत्री राजेश टोपे यांनी दिली आहे. तसेच जिनोम सिक्वेन्सिंगसाठी नागपूर आणि औरंगाबाद येथे नव्याने लॅबची निर्मिती करण्यात येणार असल्याची माहिती त्यांनी यावेळी दिली.

ते म्हणाले की, ओमिक्रॉनची वाढती संख्या पाहता राज्य सरकार आता केंद्राकडे बूस्टर डोसचा आग्रह करणार आहे. सध्या राज्यात तीन जिनोम सिक्वेन्सिंगच्या लॅब आहेत त्यामुळे या लॅब वेळीच वाढवण्याचा विचार आहे, जेणेकरुन भविष्यात गडबड आणि तुटवडा निर्माण होऊ नये. या लॅब नागपूर, औरंगाबादमध्ये होणार असल्याचीही त्यांनी माहिती दिली.

लहान मुलांचं लसीकरण आणि बूस्टर डोससाठी सरकारकडे आग्रह धरणार असल्याचं सांगत असतानाच त्यांनी राजकीय सभा, बैठकांमध्ये वाढती संख्या चिंताजनक असल्याचं म्हटलंय. त्यासाठी काटेकोर नियमांची अंमलबजावणी करणार असल्याचंही ते म्हणालेत.