मुंबई : महाविकास अघाडीच्या अनेक नेत्यांवर गैरकारभार केल्याचे आरोप करणाऱ्या किरीट सोमय्या (Kirit Somaiya) यांनी त्यांचा मोर्चा मुख्यमंत्री उध्दव ठाकरे (CM Udhhav Thackeray) यांच्याकडे वळवला आहे. किरीट सोमय्या सोलापूर दौऱ्यावर आहेत. त्यांनी या ठिकाणी पत्रकार परिषद घेऊन पवार कुटुंबियांवर मोठे आरोप केले आहेत. दरम्यान त्यांनी उध्दव ठाकरेंच्या मेव्हण्यांची बेनामी कंपन्यात गुंतवणूक असल्याचा आरोप करत थेट मुख्यमंत्र्यांवर निशाणा साधला आहे. या संबंधी मुख्यमंत्र्याना उत्तरे द्यावी लागतील असे सोमय्या यावेळी म्हणाले.

अजित पवार यांच्या प्रकरणी बोलताना सोमय्या म्हणाले की, 9 दिवसांच्या धाडीचा दुसरा अंतिम रिपोर्ट येणं बाकी आहे. हे 1000 कोटींचे बेनामी व्यवहार असून यात 15 मोठे सहकारी, पत्नी मुलगा, बहीण यांच्या नावाखाली घोटाळा करण्यात आला आहे, असा दावा त्यांनी केला. सुनेत्रा पवार या दोन डझन कंपन्यांमध्ये डायरेक्टर आहेत. तर तीन डझन कंपन्यांमध्ये भागधारक मालक असल्याचे सोमय्या म्हणाले.

बहिणी, मुलगा, यजमान त्यांचा मुलगा यांच्या नावेही बेनामी कंपन्या असून हे आधी एक होल्डिंग कंपनी तयार करतात, मग त्याच्या खाली कंपन्या या करतात. महाराष्ट्र राज्य सहकारी बँक यांचीच आहे. पदाचा दुरूपयोग करून त्यांनी हे सर्व मिळवलं आहे. उपमुख्यमंत्री स्वत:चा कारखाना विकत घेतात. यांचेच बिल्डर कंपन्या विकत घेतात, असा आरोपही सोमय्या यांनी केला. यावेळी ईडी आणि सीबीआय त्यांचं काम करतच राहणार, असंही त्यांनी सांगितलं.