मुख्यमंत्री उद्धव ठाकरे (CM Uddhav Thackeray) यांचे स्वीय सहायक आणि शिवसेनेचे सचिव मिलिंद नार्वेकर (Milind Narvekar) यांच्या दापोलीतील (Dapoli) अवैध बंगल्यावर ऑगस्ट महिन्यात कारवाई करण्यात आली होती. भाजपचे माजी खासदार किरिट सोमय्या (Kirit Somaiya) यांनी तक्रार दाखल केली होती. यानंतर रत्नागिरी (Ratnagiri) जिल्ह्यातील दापोलीत समुद्र किनारी असलेला बंगला पाडण्यात आला होता. आता किरिट सोमय्या यांनी एक फोटो सोशल मीडियावर शेअर केला आहे.

सोमय्या यांनी फोटो शेअर करताना म्हटलं की, दापोली समुद्र किनाऱ्यावरील मिलिंद नार्वेकर (शिवसेना) यांचा जमीनदोस्त झालेला बंगला. फोटोमध्ये जुलै महिन्यात बंगल्याचा फोटो दिसत आहे तर त्याच ठिकाणी डिसेंबरमध्ये बंगला पाडल्यानंतरचा दुसरा एक फोटो सोमय्या यांनी पोस्ट केला.

नार्वेकर यांनी बंगल्याचे बांधकाम करताना सीआरझेड कायद्याचे उल्लंघन केल्याचा आरोप भाजप नेते किरिट सोमय्या यांनी केला होता. यासाठी वेगवेगळ्या पातळीवर सोमय्या यांनी तक्रार दाखल केली होती. कायद्याचं उल्लंघन करत झालेल्या या बांधकामावर कारवाईनंतर किरिट सोमय्या यांनी आपण स्वत: बंगला पाडल्यानंतर बघायला जाऊ असं सांगितलं होतं.