राणा दाम्पत्याला पोलीस स्टेशनमध्ये भेटायला गेलेले भाजपा नेते किरीट सोमय्या यांच्यावर शिवसैनिकांनी हल्ला केला. त्यानंतर किरीट सोमय्या यांच्या नावाने पोलिसांनी बोगस एफआयआर दाखल केला, असल्याचा आरोप सोमय्या यांनी केला होता. त्या प्रकरणी सोमय्या यांनी दिल्लीत गृहसचिव आणि गृहराज्यमंत्र्यांनंतर आज राज्यपालांची भेट घेतली होती. त्यानंतर त्यांनी भाजपा नेत्यांसह आज राज्यपालांची भेट घेतली.

किरीट सोमय्या यांच्याविरोधात मुंबई पोलिसांनी दाखल केलेल्या बोगस एफआयआऱ प्रकरणी गोपाळ शेट्टी, प्रवीण दरेकर, सुनील राणे मंगल प्रसाद लोढा यांनी राज्यपाल भगतसिंग कोश्यारी यांची भेट घेतली. अर्धा तास झालेल्या या चर्चेनंतर प्रवीण दरेकर तसंच किरीट सोमय्या यांनी माध्यमांशी संवाद साधला. यावेळी प्रवीण दरेकर म्हणाले की, किरीट सोमय्या यांच्यावर दाखल केलेल्या बोगस एफआयआरबद्दल राज्यपालांशी चर्चा केली. पोलिसांमार्फत सुरू असलेला दहशतवाद राज्यपालांच्या कानावर घातला आहे. हा खोटा एफआय़आर मागे घेण्यात यावा, अशी मागणी आम्ही राज्यपालांकडे केली आहे. तसंच सोमय्या यांच्यावर झालेल्या हल्ल्यावेळी सरकारने बघ्याची भूमिका घेतली असा आरोपही दरेकर यांनी केला आहे.

हे सरकार सूडाने पेटलेलं आहे. किरीट सोमय्या या सरकारचा भ्रष्टाचार बाहेर काढत असल्याने त्यांना नष्ट करण्याचा सरकारचा डाव आहे. त्यामुळे एक शेवटची आशा म्हणून आम्ही राज्यपालांकडे आलो आहोत असं प्रवीण दरेकरांनी माध्यमांशी बोलताना सांगितलं. यानंतर किरीट सोमय्या यांनीही माध्यमांशी संवाद साधला. यावेळी बोलताना त्यांनी सांगितलं की, आपण राज्यपालांकडे पोलीस आय़ुक्त संजय पांडे यांच्यावर कारवाई करण्याची मागणी केली आहे. तसंच बनावट एफआयआर रद्द करून खरी एफआयआर का घेत नाही? असा सवालही सोमय्या यांनी उपस्थित केला आहे.