मुंबई - कोल्हापूर खंडपीठ कृती समितीला दिलेल्या आश्वासनानुसार मुख्यमंत्री देवेंद्र फडणवीस यांनी खंडपीठाच्या मागणीचा पाठपुरावा सुरू केला आहे. कोल्हापुरात मुंबई उच्च न्यायालयाचे खंडपीठ स्थापन व्हावे यासाठी बैठक घेऊन निर्णय घेण्यात यावा, अशी विनंती फडणवीस यांनी मुख्य न्यायमूर्ती नरेश पाटील यांना 19 जानेवारी रोजी लिहिलेल्या पत्रात केली आहे.

मुंबई उच्च न्यायालयाचे खंडपीठ कोल्हापुरात सुरू व्हावे यासाठी राज्य सरकार अनुकूल आहे. गेल्या वर्षी फेब्रुवारी महिन्यात खंडपीठ कृती समितीने मुख्यमंत्र्यांची भेट घेतली होती. या भेटीत त्यांनी खंडपीठासाठी मुख्य न्यायाधीशांना पत्र देण्यात येईल, तसेच अर्थसंकल्पात 100 कोटी रूपयांची तरतूद करण्याचे आश्वासन दिले होते. सरकारने खंडपीठासाठी शेंडा पार्क येथील 100 एकर जागा उपलब्ध करून देण्याची तयारी ठेवली आहे. यापार्श्वभूमीवर कोल्हापूर बार असोसिएशन तसेच स्थानिक लोकांची मागणी लक्षात घेऊन खंडपीठाबाबत बैठक लावून त्यावर निर्णय घेण्याची विनंती फडणवीस यांनी मुख्य न्यायमूर्तींना केली आहे.