बिळाशी : राज्य शासनाच्या एकात्मिक बाल विकास विभागाने (Ekatmik Balvikas Yojana) ‘लेक लाडकी’ योजनेच्या (Lek Ladki Yojana Maharashtra) माध्यमातून मुलीच्या (Girls) भवितव्यासाठी हातभार लावण्यासाठी तिच्या जन्मापासूनच टप्प्याटप्प्याने पालकांच्या खात्यात एक लाख एक हजार रुपये जमा करण्याचा महत्त्वपूर्ण निर्णय घेतला आहे. परिपत्रकही निघाले आहे. लक्ष्मीच्या पावलांनी येणारी ‘लेक लाडकी’ भाग्यशालीच ठरणार आहे.

मुलींचा जन्मदर वाढावा, शिक्षणाला चालना मिळावी, मृत्युदर कमी व्हावा, बालविवाह रोखावेत, कुपोषण कमी व्हावे, शाळाबाह्य मुलींचे प्रमाण शून्यावर यावे, मुलींना, त्यांच्या पालकांना प्रोत्साहन मिळावे, मुलींचे सक्षमीकरण व्हावे, या उद्देशाने ‘लेक लाडकी’ ३० सप्टेंबर २०२३ पासून ही योजना सुरू केली आहे. योजनेच्या नोंदणीचे काम एकात्मिक बालविकास विभागाच्या वेब (Integrated Child Development Scheme) पोर्टलद्वारे लाभार्थ्यांची नोंदणी होईल. विशेषतः अंगणवाड्यांतील सेविकांकडे हे काम असेल. राज्यातील विशेषतः गरीब कुटुंबात जन्मणाऱ्या लेकींसाठी योजना वरदान ठरणार आहे.

...यांना मिळणार लाभ

थेट लाभार्थी हस्तांतरणाद्वारे (डीबीटी) लाभार्थी रक्कम संबंधित पालकांना अदा करण्यात येणार आहे. त्यांचे वार्षिक उत्पन्न लाखांपेक्षा कमी असावे, मुलीचा जन्म १ एप्रिल २०२३ नंतर झालेला असावा, एका अथवा दोन मुलींना, त्याचप्रमाणे एक मुलगा, एक मुलगी असल्यास मुलीला लाभ मिळेल. दुसऱ्या प्रसूतीवेळी जुळी अपत्ये जन्मल्यास मुलींना योजनेचा लाभ मिळेल. पिवळे व केशरी रेशन कार्डधारक कुटुंबातील मुलींना पाच टप्प्यात एक लाख एक हजार रुपये एवढा लाभ मिळेल.

एकूण मिळणार १ लाख ५ हजार

कौटुंबिक परिवारात मुलीचा जन्म झाल्यावर ५ हजार, पहिलीत गेल्यावर ६ हजार, सहावीत गेल्यावर ७ हजार, अकरावीत गेल्यावर ८ हजार, अठरा वर्षे पूर्ण झाल्यावर ७५ हजार, असे १ लाख ५ हजार रुपये मिळणार आहेत.

मुलींच्या जन्माच्या स्वागतासाठी योजना पूरक ठरेल. मुलींचा जन्मदर वाढेल. शिक्षणाला आणखी चालना मिळेल. पर्यायाने मृत्युदरही कमी होईल. मुलींचे सक्षमीकरण होईल.

-सौ. छबूताई दळवी, अंगणवाडी शिक्षक.