Chhagan Bhujbal On Maratha Reservation: जातीने कुणबी असलेल्यांना प्रमाणपत्र शोधून देण्यासाठी न्यायाधीश शिंदे यांची समिती स्थापन केली. निजामशाही आणि वंशावळीप्रमाणे पत्र मिळाली आहेत, त्यामुळे आता समितीचे काम संपले आहे.

त्यामुळे मुख्यमंत्री एकनाथ शिंदे यांनी समिती बरखास्त करावी, अशी मागणी राज्याचे अन्न व नागरी पुरवठामंत्री छगन भुजबळ यांनी केली. तसेच कुणबी प्रमाणपत्र देण्यास सुरुवात केल्यानंतर खाडाखोड करून प्रमाणपत्र मिळवले जात आहे, त्यास विरोध असल्याचा गंभीर आरोपही भुजबळ यांनी केला.

पुण्यातील शासकीय विश्रामगृहात भुजबळ यांनी पत्रकारांशी संवाद साधला. भुजबळ म्हणाले, ‘‘निजामशाही आणि वंशावळप्रमाणे पत्र मिळाली आहेत, असे आपोआपच ओबीसीमध्ये समाविष्ट होतात. त्यानंतर त्यांची फक्त जातपडताळणी करून घेण्याचे काम शिल्लक राहते. जातीने कुणबी असलेल्यांना कुणबी प्रमाणपत्र शोधून ते द्यावे अशी मूळ मागणी होती. त्यासाठी न्यायमूर्ती शिंदे यांची समिती स्थापन केली.

या समितीचे काम सुरू झाल्यानंतर पहिल्यांदा पाच हजार कुणबी प्रमाणपत्र मिळाल्याचे जाहीर केले. त्यानंतर साडेअकरा हजार झाले. पण ही समिती आता जिल्ह्याजिल्ह्यात कुणबी प्रमाणपत्र शोधत आहे, हे या समितीला सांगितलेले नव्हते. त्यामुळे समितीचे काम संपले असून, सरसकट कुणबी प्रमाणपत्र द्या, अशी मागणी आम्ही कधी मान्य केली नाही आणि करणारही नाही.’’(Latest Marathi News)

मराठवाड्यातील काही ठिकाणी पेनने खाडाखोड करून कुणबी नोंद करत आहेत. त्याचे पुरावे प्रकाश शेंडगे यांनी मुख्यमंत्र्यांकडे दिले आहेत. खाडाखोड केलेल्यांना ओबीसीत सामावून घेतले जाणार नाही, असेही भुजबळ यांनी सांगितले.

भुजबळ म्हणाले...

• मराठा ओबीसी नसल्याचे सर्वोच्‍च न्यायालयाने स्पष्ट केले आहे

• मराठ्यांना हे आरक्षण दिल्यास कायद्यात टिकणार नाही

• मी कोणत्याही जातीचा प्रचार करत नाही व कोणाचाही विरोधक नाही

• मी केवळ ओबीसींच्या हक्कासाठी लढत आहे

• बीड हल्ल्याच्या वेळी पोलिस हतबल का झाले याची चौकशी करावी

  (Latest Marathi News)