मुंबई : राज्यात गेल्या 24 तासात 2369 नव्या कोरोना बाधितांची नोंद करण्यात आली असून, 1402 जणांनी कोरोनावर मात केली आहे. तर, चोवीस तासात पाच जणांचा कोरोनामुळे मृत्यू झाल्याची नोंद करण्यात आली आहे. आज नोंदवण्यात आलेल्य एकूण रूग्णांपैकी 1062 रूग्ण हे केवळ एकट्या मुंबईतील असल्याने प्रशासनासह नागरिकांची चिंता वाढली आहे. (Maharashtra Corona Update News In Marathi)

राज्यात सध्या रूग्ण बरे होण्याचे प्रमाण 97.83 टक्क्यांवर (Corona Recovery Rate) नोंदवण्यात आले असून, मृत्यूदर 1.85 टक्के इतका झाला. सध्या राज्यात 25,570 सक्रिय रुग्णांची नोंद करण्यात आली आहे. यातील सर्वाधिक 12,479 सक्रीय रूग्ण हे मुंबईतले असून, त्यानंतर ठाण्यात 5871 सर्वाधिक सक्रिय रुग्ण आहेत. तर दुसरीकडे देशात गेल्या 24 तासांत 17 हजार 73 नवीन कोरोनाबाधितांची नोंद करण्यात आली असून, 21 रुग्णांचा कोरोनामुळे मृत्यू झाल्याची नोंद करण्यात आली आहे.

देशात सध्या 94 हजारांहून अधिक रुग्ण कोरोना विषाणूच्या संसर्गावर उपचार घेत असून, 24 तासांत देशात 15 हजार 208 रुग्ण कोरोनामुक्त झाले आहेत. देशातील कोरोना रुग्ण बरे होण्याचे प्रमाण 98.57 टक्क्यांवर पोहोचले असून, दैनंदिन रुग्ण सकारात्मकता दर 5.62 टक्क्यांवर पोहोचला आहे. कोरोना महामारी सुरु झाल्यास आतापर्यंत भारतात 5 लाख 25 हजार 20 कोरोना रुग्णांचा मृत्यू झाला आहे.