विधानसभा 2019 : मुंबई - आदित्य ठाकरे माझ्या कुटुंबातीलच व्यक्‍ती आहे. त्यामुळे वरळी मतदारसंघात उमेदवार न देण्याचा माझा निर्णय योग्य होता, असे स्पष्टीकरण मनसेचे अध्यक्ष राज ठाकरे यांनी दिले. राष्ट्रीय तसेच प्रादेशिक वृत्तवाहिन्यांच्या मुलाखतीत त्यांनी पक्षाची भूमिका स्पष्ट केली.

आदित्य ठाकरे यांच्या निवडणूक लढविण्यावर राज ठाकरे यांनी पहिल्यांदाच भाष्य केले. आदित्य ठाकरे असो किंवा माझा मुलगा अमित ठाकरे, त्यांना जर वाटत असेल निवडणूक लढवावी तर नाही का म्हणायचे, असा सवाल राज यांनी केला. ‘शिवसेनाप्रमुख बाळासाहेब ठाकरे हे व्यंग्यचित्रकार होते. त्यांनी त्यांचे म्हणणे उद्धव आणि माझ्यावर लादले नाही. आमच्यावर असे संस्कार असतील, तर आमच्या मुलांना निवडणूक लढवावी, असे वाटत असेल, तर त्यात गैर नाही,’ अशा शब्दांत राज यांनी भूमिका स्पष्ट केली.