पुणे : पूर्व विदर्भात दमदार पावसाने हजेरी लावली असून, कोकण, मध्य महाराष्ट्र, मराठवाड्यात तुरळक ठिकाणी हलक्या ते मध्यम स्वरूपाचा पाऊस पडला. रविवारी (ता. १६) सकाळी ८.३० पर्यंतच्या २४ तासांमध्ये चंद्रपूर, गडचिरोली आणि गोंदिया जिल्ह्यांत अतिवृष्टी झाली आहे.

चंद्रपूर जिल्ह्यातील सावळी येथे सर्वाधिक १४० मिलिमीटर, नागभिड येथे १२० मिलिमीटर, तर गडचिरोली येथे ११० मिलिमीटर पावसाची नोंद झाली आहे. घाटमाथ्यावरही तुरळक ठिकाणी जोरदार पाऊस पडला.

रविवारी (ता. १६) सकाळी ८.३० वाजेपर्यंतच्या २४ तासांत पडलेला पाऊस, (मि.मी.) कोकण : मुरबाड, तळा, शहापूर, वाडा प्रत्येकी ५०, वैभववाडी ४०, अंबरनाथ, जव्हार, माथेरान, राजापूर प्रत्येकी ३०.

मध्य महाराष्ट्र : गगनबावडा, अक्कलकुवा, इगतपुरी, राधानगरी, लोणावळा प्रत्येकी ५०, पाचोरा, महाबळेश्‍वर, पेठ, शाहूवाडी, हर्सूल प्रत्येकी ४०, ओझरखेडा, शिरपूर प्रत्येकी ३०.

मराठवाडा : खुलताबाद, परभणी प्रत्येकी ३०, सेनगाव, भेकरदन प्रत्येकी २०.

विदर्भ : सावळी १४०, नागभिड १२०, गडचिरोली ११०.

सेल्फीच्या नादात चार तरुण बुडाले

नागभीड (जि. चंद्रपूर) : घोडाझरी तलावात पार्टीसाठी गेलेले चार तरुण सेल्फी काढण्याच्या नादात तलावात बुडाले. ही घटना रविवारी सायंकाळी घडली. मनीष श्रीरामे (वय २६), धीरज झाडे (२७), संकेत मोडक (२५) आणि चेतन मांदाडे (१७) अशी बुडालेल्या तरुणांची नावे असून, ते सर्व वरोरा तालुक्यातील शेगाव येथील रहिवासी आहेत. त्यापैकी एकाचा मृतदेह मिळाला असून, उर्वरित तिघांचा शोध सुरू आहे.

राज्यातील पाऊस

• अकोल्यात रिमझिम पाऊस सुरू

• नागपुरात पावसाची हजेरी

• नाशिक, सोलापूर जिल्ह्यांत हलक्या सरी

• कोल्हापूर जिल्ह्यात पश्‍चिमेकडे पाऊस

• जळगावमध्ये मध्यम, धुळ्यात तुरळक सरी

• परभणी, हिंगोलीत ढगाळ वातावरण