Maratha Reservetion :जालना जिल्ह्यातील अंतरवाली सराटी येथे मराठा आरक्षणासाठी सुरू असलेल्या मनोज जरांगे-पाटील यांच्या उपोषणामुळे राज्यभरात पडसाद उमटू लागले आहेत. गावखेड्यांतील सर्वसामान्य मराठा बांधव रस्त्यांवर येत असून काही ठिकाणी हिंसक वळण लागल्याच्या घटना घडल्या आहेत.

अशा घटनांत एसटी महामंडळाचेही नुकसान झाल्याने सोमवारी सायंकाळी ४ वाजेपर्यंत पाच दिवसात १३ एसटी बसची तोडफोड करण्यात आली आहे. त्यामुळे राज्यभरातील ३६ आगार बंद ठेवण्यात आले आहेत.

जालना, लातूर, नांदेड, परभणी हे आगार बंद करण्यात आले आहेत. एकूणच मराठा आरक्षण आंदोलनाचा मराठवाड्यात सर्वाधिक परिणाम झाला आहे, तर मुंबई, नागपूर, कोकण, पुणे, अमरावती या विभागांमधील एसटीची सेवा सुरळीत सुरू आहे.

स्थानिक पोलिस प्रशासनाच्या संमतीनेच एसटीची सेवा सुरू करावी; अन्यथा परिस्थिती सामान्य होईपर्यंत एसटीचे आगार बंद ठेवण्यात येणार आहेत, अशी माहिती एसटी महामंडळ प्रशासनाने दिली आहे. यामुळे एसटीचे कोट्यवधींचे नुकसान होत आहे.

हे आगार बंद

• छत्रपती संभाजीनगर: दोन, गंगापूर, पैठण

• बीड : बीड, धारूर, अंबाजोगाई, पाटोदा, माजलगाव, परळी, गेवराई

• जालना: अंबड, जाफराबाद, जालना, परतूर

• लातूर : लातूर, औसा, निलंगा, अहमदपूर, उदगीर

• नांदेड : किनवट, माहूर, नांदेड, भोकर, मुखेड, देगलूर, कंधार, हदगांव, बिलोली

• धाराशिव : कळंब

• परभणी : पाथरी, हिंगोली, कळमनुरी, गंगाखेड, परभणी, जिंतूर, वसमत