मुंबई - राज्यात विशेषतः मराठवाड्यात मराठा-कुणबी जातप्रमाणपत्र वाटपावरून मराठा आंदोलकांकडून रोष व्यक्त होत असतानाच आता याबाबत वेगळीच माहिती समोर आली आहे. ‘सकाळ’ला उपलब्ध झालेल्या माहितीनुसार १९८६ पासून सप्टेंबर- २०२३ पर्यंत मराठवाड्यातील आठही जिल्ह्यांमध्ये केवळ १४२ ‘मराठा - कुणबी’ जात प्रमाणपत्रांचे वाटप झाल्याची माहिती समोर आली आहे.

मराठवाडा वगळता राज्यात इतरत्र १९८६ पासून ३८ लाखांच्या आसपास ‘मराठा - कुणबी’ जात प्रमाणपत्रांचे वाटप झाल्याचे दिसून आले. मराठवाड्यातील बीडमध्ये ९९ आणि जालन्यात ४२ ‘मराठा-कुणबी’ जात प्रमाणपत्र दिली गेल्याची माहिती समोर आली आहे.

छत्रपती संभाजीनगर, धारशिव, हिंगोली, परभणी, नांदेड आणि लातूरमध्ये एकही मराठा- कुणबी जात प्रमाणपत्र सप्टेंबर-२०२३ पर्यंत देण्यात आलेले नाही, अशी माहिती विश्वसनीय सूत्रांकडून देण्यात आली. नेमकी हीच बाब लक्षात घेऊन मराठा- कुणबी नोंदी शोधण्यासाठी न्या.संदीप शिंदे यांच्या अध्यक्षतेखाली समिती स्थापन करण्यात आली होती. आताही मराठवाड्यातील १४२ कुणबी जात प्रमाणपत्र नोंदींचा आकडा हा खूपच कमी असल्याने याबाबत माहिती घेण्याच्या सूचना संबंधित जिल्ह्यांतील अधिकाऱ्यांना देण्यात आल्या आहेत.

विदर्भाला मोठा लाभ

राज्यात मराठवाडा वगळता इतर कोणत्याही भागातील जिल्ह्यात नोंदी न सापडल्याची तक्रार नव्हती. राज्यात १९८६ पासून सप्टेंबर २०२३ पर्यंत ३८ लाखांच्या आसपास मराठा कुणबी जात प्रमाणपत्रांचे वाटप करण्यात आले आहे. त्यापैकी सर्वाधिक कुणबी प्रमाणपत्रे ही विदर्भातील मराठा समाजाला देण्यात आली आहेत.

म्हणून प्रमाणपत्र नाही

मराठवाड्यात मराठा-कुणबी नोंदी शोधल्या जात नाहीत त्यामुळे आठही जिल्ह्यांमध्ये मराठा - कुणबी जात प्रमाणपत्र मिळत नसल्याची तक्रार मराठवाड्यातील मराठा समाजाची होती. त्यामुळेच नोंदी शोधण्याचे काम हाती घेण्यात आले. राज्य सरकारने स्थापन केलेल्या माजी न्या. संदीप शिंदे समितीने मराठा आंदोलकांची जी तक्रार आहे त्यात कितपत तथ्य आहे याचा आढावा अलीकडे घेतला आहे.

त्यामध्ये सर्व जिल्ह्यांमधून मराठा - कुणबी जात प्रमाणपत्रांचे किती वाटप झाले? याची आकडेवारी सादर करण्यास सांगितले होते. त्यानुसार मराठवाड्यात केवळ १४२ मराठा - कुणबी जात प्रमाणपत्रे दिली गेल्याचे समोर आले आहे.