पुणे - राज्यातील गरीब मराठा समाजाला कायदेशीर टिकणारे आरक्षण मिळावे, अशी मागणी स्वराज्य संघटनेचे संस्थापक छत्रपती संभाजीराजे यांनी शनिवारी (ता. १८) राज्य मागासवर्ग आयोगाचे अध्यक्ष निवृत्त न्यायमूर्ती आनंद निरगुडे यांच्याकडे केली.

या मागणीसाठी आणि मराठा समाजाने आरक्षणाबाबत उपस्थित केलेले प्रश्‍न आयोगाकडे सादर करण्यासाठी पूर्वनियोजित कार्यक्रमानुसार छत्रपती संभाजीराजे यांनी न्या. निरगुडे यांची भेट घेत, त्यांच्याशी आणि राज्य मागासवर्ग आयोगाच्या सर्व सदस्यांशी चर्चा केली. यावेळी त्यांच्यासमवेत स्वराज्य संघटनेचे रघुनाथ चित्रे पाटील, अंकुश कदम, विनोद साबळे, अप्पासाहेब कुडेकर, धनंजय जाधव आदी प्रमुख पदाधिकारी उपस्थित होते.

या बैठकीनंतर संभाजीराजे यांनी पत्रकारांशी संवाद साधला. यावेळी बोलताना ते म्हणाले, ‘राज्य मागासवर्ग आयोगाचे अध्यक्ष न्या. आनंद निरगुडे यांना मी दोन आठवड्यांपूर्वी पत्र दिले होते. या पत्रात त्यांच्याकडे भेटीची वेळ मागितली होती. सध्या पुण्यात राज्य मागासवर्ग आयोगाची बैठक चालू आहे. त्यामुळे त्यांनी मला माझ्या पत्रातील मागणीनुसार आज वेळ दिली होती.

या भेटीत मी त्यांना राज्यातील मराठा समाजाच्या वतीने आरक्षणाबाबत उपस्थित कऱण्यात आलेले बारा ते तेरा प्रश्‍न विचारले आणि त्यांना या प्रश्‍नांची यादी दिली. त्यांनी आमचे सर्व प्रश्‍न ऐकून घेतले. मात्र त्यावर त्यांनी काहीही मत व्यक्त केले नाही.’

राज्यातील सध्याच्या सामाजिक घडामोडी पाहता, गरीब मराठा समाजाला कायदेशीर टिकणारे आरक्षण मिळावे, यासाठी आमचे प्रयत्न सुरू आहेत. सर्व समाजांमध्ये एकोपा राहावा आणि राज्यातील सामाजिक वातावरण बिघडू नये, यासाठीसुद्धा प्रयत्न करणार आहे. मागील काळात छगन भुजबळ हे फुले, शाहू, आंबेडकर यांच्या विचारांचे वारस असल्याचे मत मी व्यक्त केले होते.

परंतु छगन भुजबळ यांनी कालच्या ओबीसीच्या समाजाच्या मेळाव्यात केलेल्या वक्तव्यातून त्यांची जातीयवादी भूमिका स्पष्ट झाली आहे. त्यांच्या या वक्तव्याबद्दल मला पश्चात्ताप होत आहे, असेही मत त्यांनी यावेळी व्यक्त केले.