मुंबई - शिवसेना आमदार अपात्रतेप्रकरणी विधानसभा अध्यक्ष राहुल नार्वेकर यांनी दिलेल्या निकाला विरोधात शिवसेना शिंदे गटाने मुंबई उच्च न्यायालयात धाव घेतली आहे. ठाकरे गटाच्या आमदारांना अपात्र ठरवण्यात न आल्याने शिंदे गटाचे पक्ष प्रतोद आमदार भरत गोगावले यांनी हायकोर्टात याचिका दाखल केली आहे या याचिकेची आज न्यायालयाने दखल घेत नार्वेकर यांच्या सह सर्व १४ आमदारांना नोटीस बजावत उत्तर देण्याचे निर्देश दिले.

शिवसेनेत उभी फूट पडल्यानंतर पक्षाच्या शिंदे आणि ठाकरे गटाकडून एकमेकांच्या आमदारांना अपात्र ठरवण्यासाठी याचिका दाखल करण्यात आल्या. विधानसभेचे अध्यक्ष राहुल नार्वेकर यांच्यासमोर सप्टेंबर ते डिसेंबर २०२३ या कालावधीत शिवसेना आमदार अपात्रतेवर सुनावणी पूर्ण झाली. त्याचा निकाल राहुल नार्वेकर यांनी १० जानेवारी रोजी जाहीर केला.

राहुल नार्वेकर यांनी एकनाथ शिंदे आणि त्यांच्या आमदारांना दिलासा देतानाच, ठाकरे गटाच्या आमदारांना अपात्र ठरवल नाही. ठाकरे गटाच्या आमदारांना अपात्र न ठरवल्यामुळे आमदार भरत गोगावले यांनी हायकोर्टात याचिका दाखल केली. विधानसभा अध्यक्षांचा निर्णय मनमानीकारक, बेकायदेशीर व असंविधानिक आहे. रेकॉर्डवर सादर करण्यात आलेले पुरावे विधानसभा अध्यक्षांनी विचारात घेतले नाही.

इतकेच काय तर ठाकरे गटातील आमदारांनी स्वेच्छेने पक्षाचे सदस्यत्व सोडले होते हे लक्षात घेण्यात विधानसभा अध्यक्ष अपयशी ठरले असे याचिकेत नमूद करण्यात आले आहे. त्यामुळे ठाकरे गटाच्या आमदारांना अपात्र न ठरवण्याचा आदेश रद्द करावा अशी मागणी याचिकेत करण्यात आली आहे.

त्यावर आज न्यायमूर्ती गिरीश कुलकर्णी आणि न्यायमूर्ती फिरदोष पुनिवाला यांच्या खंडपीठासमोर सुनावणी घेण्यात आली. त्यावेळी न्यायालयाने सर्व पक्षकारांना याचिकेवर उत्तर देण्याचे निर्देश देत सुनावणी ८ फेब्रुवारी पर्यंत तहकूब केली.