मुंबई : बारामतीचा पोपट अशी मुख्यमंत्री देवेंद्र फडणवीस यांनी राज ठाकरेंवर टीका केल्यानंतर आता मनसे नेते संदीप देशपांडे यांनी स्वतः अर्धी चड्डी घालणाऱ्यांनी आमच्या कपड्यांची काळजी करू नये असे म्हटले आहे.

महायुतीची रविवारी कोल्हापुरात सभा झाली. या सभेत मुख्य़मंत्र्यांनी राज ठाकरे यांच्यावर जोरदार टीका करत तुमचे सगळे कपडे आम्ही उतरविल्याचे म्हटले होते. मुख्यमंत्री म्हणाले होते, की आमचे कपडे उतरविणारा जन्माला यायचा आहे. काही जण स्वतः बोलू शकत नाही, त्यामुळे त्यांनी पोपट नेमले आहेत. बारामतीचे पोपट बोलू लागले आहेत. आमचे कपडे कोणी उतरवू शकत नाहीत. तुमचे वेगवेगळ्या निवडणुकीत सगळे कपडे उतरविले गेलेले आहेत. कोणाची सुपारी घेण्यापेक्षा घरी शांत बसा.

या टीकेनंतर मनसे नेते संदीप देशपांडे यांनी ट्विट करत म्हटले आहे, की स्वतः अर्धी चड्डी घालणाऱ्यांनी आमच्या कपड्यांची काळजी करू नये, नाहीतर उरलेली चड्डी पण काढून घेण्यात येईल. आता याला भाजप कसे प्रत्युत्तर देणार हे पाहणे उत्सुकतेचे ठरणार आहे.