Mumbai News: मुंबईतल्या सेंट जॉर्ज रुग्णालयामध्ये चतुर्थश्रेणी रुग्णालयीन कर्मचाऱ्याचा मृत्यू झाल्याची घटना बुधवारी घडली होती. या घटनेनंतर विधानसभेचे अध्यक्ष राहुल नार्वेकर यांनी रुग्णालयाला भेट देऊन दोषींवर कारवाईचे संकेत दिले होते. त्या अनुषंगाने गुरुवारी विधीमंडळामध्ये एक तातडीची बैठक होणार आहे.

सेंट जॉर्ज रुग्णालयातील चतुर्थ श्रेणी कर्मचारी अनिस चव्हाण यांच्या डोक्याला एका अपघातात दुखापत झाली होती. त्यामुळे त्यांना याच रुग्णालयात दाखल करण्यात आलेले होते. परंतु दीड ते दोन तास डॉक्टर डॉक्टर उपलब्ध नसल्याने त्यांचा मृत्यू झाला.

सेंट जॉर्ज रुग्णालयातील कर्मचाऱ्याचा वेळेवर उपचार न मिळाल्याने मृत्यू झाल्याने संताप व्यक्त होतोय. वरिष्ठ डॉक्टर हॉस्पिटलमध्ये नसल्याने त्यांना दोन ते अडीच तास उपचार मिळाले नाहीत असा आरोप चव्हाण कुटुंबीय आणि सहकर्मचाऱ्यांकडून करण्यात आलाय.

घटनेनंतर विधानसभा अध्यक्ष राहुल नार्वेकरांनी रुग्णालयाला भेट देऊन घटनेची माहिती घेतली. त्यानंतर या प्रकरणात कारवाईचे आदेश दिले आहेत. त्यानंतर दोन डॉक्टरांचे निलंबन झालं आहे. याशिवाय गुरुवारी दुपारी या घटनेबाबत विधीमंडळात बैठक घेणार आहे.

या बैठकीला वैद्यकीय शिक्षण मंत्री हसन मुश्रीफ आणि महत्त्वाचे अधिकारी उपस्थित राहणार आहेत. रुग्णालयातील सीसीटीव्ही फुटेज तपासून कठोर कारवाई करण्याचे पोलिसांना आदेश देण्यात आले आहेत. रुग्णालयीन कर्मचाऱ्याचाच अशा प्रकारे डॉक्टरांच्या अनास्थेमुळे मृत्यू झाल्याने संताप व्यक्त होतोय.