सांगली : शेतकरी आत्महत्येच्या मुद्द्यावरून राष्ट्रवादी काँग्रेसचे प्रदेशाध्यक्ष जयंत पाटील यांनी सरकारला (Maharashtra Government) टार्गेट केले आहे. चहूबाजूने शेतकरी बांधव संकटात सापडला आहे. त्यांना सहाय्य करण्याऐवजी त्यांचा आवाज दाबण्याचा प्रयत्न होत आहे. सरकारचा तोल ढासळल्याचे हे लक्षण आहे, अशी टीका जयंत पाटील (Jayant Patil) यांनी केली आहे.

जयंत पाटील यांनी ‘एक्स हँडल’वरून सरकारवर टीका केली आहे. त्यांनी म्हटले आहे, की यवतमाळ जिल्ह्यातील तरुण शेतकऱ्याने विधानभवनाच्या प्रवेशद्वाराशी विष पिऊन स्वतःला संपवण्याचा प्रयत्न केला. शेतमालाला भाव नाही म्हणून आत्महत्या करत असल्याची आर्तता त्याच्या आवाजात होती. दुर्दैव म्हणजे सगळा प्रकार दाबण्याचा प्रयत्न केला गेला.

चहूबाजूने शेतकरी संकटात सापडला आहे. त्यांना सहाय्य करण्याऐवजी आवाज दाबण्याचा प्रयत्न होत आहे. सरकारचा तोल ढासळल्याचे हे लक्षण आहे. शेतकरी बांधवांना विनंती आहे, की हार मानू नका. सत्ताधाऱ्यांना झुकवल्याशिवाय शांत बसणार नाही, असा इशाराही त्यांनी दिला.