मुंबई - मागील काही दिवसांपासून पक्षांतराच्या चर्चांना उधाण आलं आहे. काँग्रेसचे दिग्गज नेते आणि माजी मुख्यमंत्री अशोक चव्हाण भाजपमध्ये जाणार असल्याच्या चर्चा रंगल्या होत्या. त्यातच मराठवाड्यातील नांदेडकरांसह लातूरकरही भाजपच्या वाटेवर असल्याचं सूचक विधान वंचित बहुजन आघाडीचे नेते प्रकाश आंबेडकर यांनी केलं आहे.

शिवसेनेत उभी फूट पडल्यानंतर भाजपने बाहेर पडलेल्या शिंदे गटासोबत सरकार स्थापन केलं. मात्र हा मुद्दा सर्वोच्च न्यायालयात गेला असून १६ आमदारांच्या अपात्रतेचा मुद्दा प्रलंबित आहेत. 16 आमदार पात्र ठरले तरच सरकार कायम राहणार आहे. आता याबाबत प्रकाश आंबेडकरांनी सूचक विधान केलं आहे.

प्रकाश आंबेडकर म्हणाले की, शिंदे-फडणवीस सरकारमधील १६ आमदार अपात्र ठरले तर नांदेडकर आणि लातूरकर फडणवीसांच्या मांडीवर जावून बसायला तयार आहेत. आमदारांच्या अपात्रतेच्या मुद्यामुळे शिंदे-फडणवीस सरकारवर टांगती तलवार आहे. मात्र प्रकाश आंबेडकरांनी भाजपचा बॅकअप प्लॅन नांदेडचं चव्हाण कुटुंबीय आणि लातूरचं देशमुख कुटुंबीय असल्याचं सूचक विधान कोणाचंही नाव न घेता केलं आहे.

नांदेडमध्ये सुरू असलेल्या धम्म मेळाव्यात प्रकाश आंबेडकर बोलत होते. यावेळी आंबेडकर यांनी काँग्रेसच्या भारत जोडो यात्रेवरही भाष्य केलं. काँग्रेसचा उपक्रम चांगला आहे. मात्र त्यातून काही साध्य होईल, असं वाटत नाही, असंही ते म्हणाले.