Warishe Murder Case : पत्रकार शशिकांत वारिशे यांच्या हत्येचे प्रकरण चांगलेच चर्चेत आले आहे. या प्रकरणाच्या तपासासाठी विशेष तपास पथकाची अर्थात एसआयटीची स्थापना करण्यात आली आहे. गृहमंत्री देवेंद्र फडणवीस यांनी ही घोषणा केली आहे. याप्रकरणावरुन उद्धव ठाकरे यांची शिवसेना देखील आक्रमक झाली आहे तसेच स्थानिक पातळीवरही या घटनेवरुन संताप व्यक्त केला जात आहे. 

दरम्यान केंद्रीय मंत्री नारायण राणे यांना प्रश्न विचारला असता ते चांगलेच संतापले. शशिकांत वारिशे यांची हत्या का झाली, कशी झाली हे पोलिस तपासात समोर येईल. संजय राऊत, विनायक राऊत यांच्या आरोपांची मी दखल घेत नाहीत. ते काही देशाचे मोठे नेते नाहीत, असे नारायण राणे म्हणाले. 

"कुठलीही हत्या झाली, अपघात झाला तर तेवढेच प्रश्न विचारायचे का. पुण्यात विकासाचे, सामाजिक कोणतेच विषय नाही आहेत का?. पत्रकारांनी कुठलाही विषय आला तर तोच लाऊन धरायचा का? स्थानिक प्रश्न प्राधान्यांने विचारले पाहीजे. जिकडे जावे तिकडे तोच विषय आहे, काय लावलं हे. चौकशी होत आहे, या प्रकरणात कुणाचे नाव असेल तर तो पाहून घेईल," असे नारायण राणे म्हणाले. 

पत्रकार शशिकांत वारिशे यांच्या मृत्यू प्रकरणानं राज्यातील राजकारण चांगलचं तापलं आहे. राज्यभरातील पत्रकारांसह, वारिशे कुटुंबिय आणि शिवसेनेनं यासंदर्भात फडणवीस यांना पत्र लिहिलं असून यातून गंभीर आरोपही केले आहेत. या प्रकरणामुळं राज्य सरकारवर तातडीनं पावलं उचलण्यासाठी दबाव वाढत होता. यापार्श्वभूमीवर पोलिसांना विशेष तपास पथक स्थापन करण्याचे आदेश देण्यात आले आहेत.