राष्ट्रवादी काँग्रेसचे नेते अजित पवार यांनी उपमुख्यमंत्रीपदाची शपथ घेत सत्तेत सहभागी होण्याचा निर्णय घेतला, यानंतर पक्षात उभी फूट पडल्याचे पाहायला मिळाले. राष्ट्रवादी पक्षात अजित पवार गट आणि शरद पवार गट अशी फूट पडली. यादरम्यान दोन्ही गटांमध्ये वर्चस्वाची लढाई पाहायला मिळत आहे.

आगामी लोकसभा आणि विधानसभेच्या निवडणूकीच्या पार्श्वभूमिवर दोन्ही गट पक्षाच्या विस्तारासाठी राज्यभर सभा घेताना दिसत आहे. तसेच राष्ट्रवादी पक्ष आणि निवडणूक चिन्हासाठी केंद्रीय निवडणूक आयोगासमोर सुनावणी देखील सुरू आहे. यादरम्यान शिराळा मतदारसंघाचे आमदार मानसिंह नाईक शरद पवारांच्या बैठकीला उपस्थित राहिल्याचे समोर आले .

राष्ट्रवादी पक्षाचे अध्यक्ष शरद पवार यांच्या उपस्थितीत आज मुंबई येथे महत्वाची बैठक बोलवण्यात आली होती, या बैठकीत लोकसभा मतदारसंघनिहाय आढावा या बैठकीत घेतला गेला. या बैठकीला पक्षाचे अनेक नेते, पदाधिकारी आणि कार्यकर्ते उपस्थित होते. याचा बैठकीला नाईक देखील उपस्थित होते.

दरम्यान शरद पवारांच्या बैठकीतून बाहेर पडल्यावर आमदार मानसिंग नाईकांचा माध्यमांना चकवा देण्याचा प्रयत्न केला. तसेच माध्यमांच्या प्रश्नावर मानसिंग नाईक चिडले देखील. मी चारवेळा सांगितलं आहे, ही काय पद्धत आहे… असं म्हणत प्रतिक्रिया देण्यास त्यानी नकार दिला.

काही दिवसांपूर्वीच राष्ट्रवादीचे नेते आणि शिराळा मतदार संघाचे आमदार मानसिंह नाईक यांनी अजित पवार गटाला समर्थन दिले होतं. यानंतर आता ते शरद पवारांच्या बैठकीसाठी आल्याने चर्चेला उधाण आलं आहे. त्यामुळे अजित पवारांची साथ सोडून ते शरद पवारांच्या पाठिशी उभे राहणार का? अशी चर्चा राजकीय वर्तुळात सुरू झाली आहे. महत्वाचे म्हणजे अद्यापही राष्ट्रवादीचे अनेक आमदार नेमके कुणासोबत आहेत, हे स्पष्ट नाहीये. त्यामुळे मानसिंग नाईक काय भूमिका घेतात याकडे सर्वांचे लक्ष लागले आहे.