सोलापूर : विद्यार्थ्यांना अर्ज भरणे सोयीचे, सुलभ व्हावे म्हणून इयत्ता अकरावीसाठी अर्ज करण्यासाठी तयार केलेल्या पोर्टलमध्ये सुधारणा केल्या जात आहेत. त्यामुळे १९ मेपासून सुरू होणारी अर्ज करण्याची प्रक्रिया आता २६ मेपासून (सोमवार) सुरू होणार असल्याचे शिक्षण संचालक डॉ. महेश पालकर यांनी सांगितले. आता माहिती पुस्तिकेत विद्यार्थ्यांना उपयोगी पडेल, अशी माहिती देण्यात आली आहे.
दहावी उत्तीर्ण विद्यार्थ्यांना अकरावीच्या प्रवेशासाठी २६ मे ते ३ जूनपर्यंत ऑनलाइन अर्ज करता येणार आहेत. एक ते दहा महाविद्यालयांचा पसंतीक्रम निवडून विद्यार्थ्यांना अर्ज भरता येणार असून त्यांच्या गुणाच्या टक्केवारीवरून प्रवेश दिले जाणार आहेत. प्रत्येक फेरीपूर्वी विद्यार्थ्याने संमती नोंदविणे आवश्यक आहे. पहिल्या, दुसऱ्या प्रवेश फेरीत प्रवेश न मिळालेल्या विद्यार्थ्यांना पुढील फेरीत प्रवाह व पसंतीक्रम अद्ययावत करावे लागतील, तशी सोय पोर्टलमध्ये उपलब्ध करून देण्यात आली आहे. ५ जून रोजी तात्पुरती सर्वसाधारण गुणवत्ता यादी प्रसिद्ध होईल. त्याची पडताळणी करून विद्यार्थ्यांना हरकती नोंदविता येणार आहेत. त्यानंतर ६ ते ७ जून रोजी त्या हरकतींवर निर्णय होईल.
८ जूनला अंतिम गुणवत्ता यादी प्रसिद्ध होईल. व्यवस्थापन कोटा, संस्थाअंतर्गत कोटा, अल्पसंख्यांक कोटा, यासाठी शून्य फेरीअंतर्गत विद्यार्थ्यांना प्रवेश मिळतील. ९ ते ११ जून या काळात ही फेरी पार पडणार आहे. ९ जूनला कॅप प्रवेश फेरी होणार असून गुणवत्ता यादीनुसार विद्यार्थी व उच्च माध्यमिक शाळांची निवड करून त्यांना प्रवेश घेता येईल. १० जूनला विद्यार्थ्यांना महाविद्यालयांचे वाटप होईल.
महाविद्यालय मान्य नसेल तर...
विद्यार्थ्यास प्रवेश फेरीत मिळालेले महाविद्यालय मान्य नसल्यास त्यांना ‘प्रोसिड फॉर ॲडमिशन’वर क्लिक करावे लागणार आहे. त्यांना पुढील फेरीसाठी संमती देऊन पुढच्या फेरीत सहभागी होता येईल. प्रवेश निश्चिती, प्रवेशास नकार किंवा प्रवेश रद्दची कार्यवाही शाळेच्या लॉगिनद्वारे होणार आहे. ज्या विद्यार्थ्यास पहिल्या पसंतीचे महाविद्यालय प्राप्त झाल्यावर त्यांनी त्याठिकाणी प्रवेश घेणे बंधनकारक आहे. ज्यांनी प्रवेश घेतला नाही, त्यांना नियमित फेरीत सहभागी होता येणार नाही. त्यांना सर्वांसाठी ‘खुली फेरी’तच सहभागी होता येईल. प्रवेश रद्द करण्यासाठी त्या विद्यार्थ्यास संबंधित महाविद्यालयाकडे विनंती करावी लागणार आहे. २० जूनला रिक्त जागा जाहीर होऊन पुढील फेरी राबविली जाणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.