सोलापूर : इयत्ता बारावीनंतर अभियांत्रिकी व तंत्रज्ञान पदविका अभ्यासक्रमाच्या पूर्णवेळ थेट द्वितीय वर्ष पदविकेची प्रवेश प्रक्रिया बुधवारी (ता. १२ जून) सुरू झाली आहे. याअंतर्गत विद्यार्थ्यांना ३ जुलैपर्यंत ऑनलाइन नोंदणी करता येणार आहे. यामध्ये थेट द्वितीय वर्ष पदविका अभ्यासक्रमांच्या वर्किंग प्रोफेशनल्स (कार्यरत व्यावसायिक) उमेदवारांच्या स्वतंत्र तुकडीची प्रवेश प्रक्रिया समाविष्ट केलेली आहे.

डिप्लोमाच्या थेट द्वितीय पदविकेसाठी विद्यार्थ्यांना ३ जुलैपर्यंत अर्ज करता येतील. पहिली तात्पुरती गुणवत्ता यादी ५ जुलैला प्रसिद्ध होईल. यादीसंदर्भात काही आक्षेप असल्यास विद्यार्थ्यांना ६ ते ०९ जुलैपर्यंत मुदत आहे. अंतिम गुणवत्ता यादी ११ जुलैला जाहीर होईल. सर्वसाधारण प्रवर्गातील विद्यार्थ्यांसाठी ४०० रुपये तर राखीव प्रवर्गासाठी ३०० रुपयांचे अर्जाचे शुल्क आहे. विद्यार्थ्यांना प्रवेशासंदर्भातील माहिती https://dsd24.dtemaharashtra.gov.in/ या संकेतस्थळावर उपलब्ध आहे.

या अभ्यासक्रमातून विद्यार्थ्यांना करिअरची संधी

शासकीय तंत्रनिकेतन सोलापूरचा इन्स्टिट्यूट कोड ६०१७ असून संस्थेत सिव्हिल इंजिनिअरिंग, मेकॅनिकल इंजिनिअरिंग, इलेक्ट्रिकल इंजिनिअरिंग, इलेक्ट्रॉनिक इंजिनिअरिंग, कॉम्पुटर इंजिनिअरिंग व माहिती तंत्रज्ञान इंजिनिअरिंग असे विविध अभ्यासक्रम शिकविले जातात. बारावीनंतर केवळ दोन वर्षात व अत्यल्प शैक्षणिक खर्चात तांत्रिक कौशल्यावर आधारित रोजगाराभिमुख शिक्षण देऊन डिप्लोमा इंजिनिअर होण्याची विद्यार्थ्यांना या माध्यमातून संधी मिळणार आहे. प्रवेश प्रक्रिया संस्थेचे प्राचार्य डॉ. अशोक उपाध्याय यांच्या मार्गदर्शनाखाली सुरू आहे.

विद्यार्थ्यांनी प्रवेशासाठी वेळेत करावेत अर्ज

बारावीनंतर अभियांत्रिकी व तंत्रज्ञान पदविका अभ्यासक्रमाच्या पूर्णवेळ थेट द्वितीय वर्ष पदविका प्रवेशाची प्रक्रिया बुधवारपासून सुरू करण्यात आली आहे. शासकीय तंत्रनिकेतन सोलापूर या संस्थेत सिव्हिल इंजिनिअरिंग, मेकॅनिकल इंजिनिअरिंग, इलेक्ट्रिकल इंजिनिअरिंग, इलेक्ट्रॉनिक इंजिनिअरिंग, कॉम्पुटर इंजिनिअरिंग व माहिती तंत्रज्ञान इंजिनिअरिंग असे विविध अभ्यासक्रम शिकविले जातात. इच्छुक विद्यार्थ्यांनी मुदतीत अर्ज करावेत.

- डॉ. अशोक उपाध्याय, प्राचार्य, शासकीय तंत्रनिकेतन सोलापूर