Latest Jalna News: कुणबी पूर्वीपासूनच ओबीसीमध्ये आहेत. त्यामुळे कागदपत्रे देऊन, कुणबी सिद्ध करून आरक्षण घेण्याचा अधिकार संविधानाने दिला आहे. मात्र, मनोज जरांगे पाटील यांच्या सगेसोयरेच्या मागणीला आपण पूर्वीपासूनच सहमत नाही. कुणबी सिद्ध करा अन् आरक्षण घ्या, असे मत वंचित बहुजन आघाडीचे अध्यक्ष प्रकाश आंबेडकर यांनी व्यक्त केले.

बुधवारी (ता. सात) जालना शहरात आयोजित करण्यात आलेल्या पत्रकार परिषदेत ते बोलत होते.

अॅड. आंबेडकर पुढे म्हणाले, आजचा दिवस ओबीसी समाजासाठी सोनेरी दिवस आहे. सात ऑगस्टरोजी ओबीसी आरक्षणाची घोषणा झाली होती. या आरक्षणामुळे ओबीसी समाजाच्या जीवनामध्ये सामाजिक, आर्थिक आणि शासकीय बदल झाला. आरक्षणामुळे ओबीसी समाजासाठी दरवाजे उघडे झाले.

मात्र, आता उघडे झालेले दरवाजे बंद करण्यासाठी प्रयत्न सुरू आहेत. त्यामुळे ओबीसी बचाव यात्रा सुरू केली आहे. मनोज जरांगे यांच्यासोबत जी गर्दी आहे, ती गरीब मराठ्यांची आहे.

परंतु, त्यांच्या सगेसोयरेच्या मागणीला आपण सहमत नाही. कारण कागदपत्रे सादर करून कुणबी सिद्ध केल्यास संविधानाने दिलेल्या अधिकारानुसार आरक्षण मिळू शकते. मात्र, ओबीसींच्या आरक्षणामध्ये मराठ्यांचा कायदेशीररीत्या समावेश होऊ शकत नाही. त्यामुळे न्यायालयाने ते नाकारले आहे, असेही आंबेडकर म्हणाले.