तात्या लांडगे

सोलापूर : जून महिन्याचे पगारबिल सादर करताना प्रत्येक शाळांच्या मुख्याध्यापकांनी २०२४-२५ या शैक्षणिक वर्षातील सेवकसंच जोडावा, असे आदेश वेतन अधीक्षक दत्तात्रय मुंढे यांनी काढले आहेत. त्या सेवकसंचात अतिरिक्त होणाऱ्या किंवा झालेल्या शिक्षकांची पगारबिले पाठवू नयेत, अन्यथा मुख्याध्यापकांच्या वेतनातून त्यांच्या खात्यात जमा झालेले वेतन वसूल केले जाईल, असा इशारा देखील त्यांनी दिला आहे.

खासगी माध्यमिक अनुदानित शैक्षणिक संस्थांनी शिक्षकांचे जून महिन्याची वेतनबिले २० जूनपर्यंत तालुक्यातील कर्मचाऱ्यांकडे सादर करायची आहेत. तसेच ज्या शाळांमध्ये मुख्याध्यापक नाही किंवा ज्या मुख्याध्यापकास पदाच्या स्वाक्षरीचे अधिकार नाहीत अशा शाळांनी वेतनबिले देऊ नयेत. तसे केल्यास संबंधित शाळेच्या मुख्यापकांवर कारवाई केली जाणार आहे. मुख्याध्यापकांनी पगारबिले अचूक असल्याची खात्री करूनच ती बिले पुढे पाठवावीत, शाळेचा ‘डीडीओ’ कोड व लेखाशिर्ष लाल शाईने नोंदवावा, अशाही सूचना करण्यात आल्या आहेत.

विशेष बाब म्हणजे दरमहा वेतनबिलांचा एकच लॉट करण्यात येणार असल्याने वेळेतच बिले देणे क्रमप्राप्त असल्याचेही वेतन अधीक्षकांनी मुख्याध्यापकांना बजावले आहे. वेतनबिले प्राप्त झाल्यानंतर शासनाकडून निधीची मागणी केली जाणार असून २५ ते २८ जूनपर्यंत निधी उपलब्ध होईल आणि ७ जुलैपूर्वी पगारी होतील, असेही अधिकाऱ्यांनी सांगितले.

अंशत: अनुदानित शाळांच्या बिलांवर नजर

जिल्ह्यातील अनेक माध्यमिक शाळा व तुकड्या तसेच कनिष्ठ महाविद्यालये अंशत: अनुदानित असून त्यांना शासनाकडून २०, ४०, ६० किंवा ८० टक्क्यांपर्यंत अनुदान देण्यात आले आहे. दरवर्षी २० टक्के अनुदान मिळणे अपेक्षित आहे, मात्र एक वर्षापासून तो टप्पा मिळालेला नाही. त्यामुळे अनेक अशा शाळांकडून वाढीव टप्पा ग्राह्य धरून शिक्षक-शिक्षकेतर कर्मचाऱ्यांची बिले सादर केली जातात. मात्र, वाढीव वेतन काढल्यास पुढील कारवाई संबंधित मुख्याध्यापक किंवा प्राचार्यावर होईल, असेही वेतन अधीक्षकांनी आदेशात नमूद केले आहे.