मुंबई : खोट्या जातप्रमाणपत्राच्या कथीत आरोपांमुळं सध्या चर्चेत असलेले नार्कोटिक्स कन्ट्रोल ब्युरोचे (एसीबी) विभागीय संचालक समीर वानखेडे यांच्या अडचणीत आणखी वाढ होण्याची शक्यता आहे. कारण राज्याचे सामाजिक न्याय मंत्री धनंजय मुंडे यांनी याबाबत सूचक विधान केलं आहे. समीर वानखेडे यांच्याविरोधात जर कोणी तक्रार दिली तर त्यांची चौकशी केली जाईल, असं मुंडे यांनी पुण्यात पत्रकारांशी बोलताना म्हटलं आहे.

“समीर वानखेडे यांच्या जातप्रमाणपत्राच्या वैधतेबद्दल कोणाला आक्षेप असेल आणि त्यानं जर यासंदर्भात सामाजिक न्याय विभागाकडे तक्रार केली तर आम्ही या प्रकरणी चौकशी करु,” असं मुंडे यांनी म्हटलं आहे. मुंडे यांच्या या सूचक विधानावरुन वानखेडे यांच्या अडचणीत भविष्यात वाढ होऊ शकते. कारण याप्रकरणी अल्पसंख्यांक मंत्री नवाब मलिक यांनी काही कागदपत्र जाहीर केल्यानंतर त्यावर आता विविध प्रतिक्रिया उमटू लागल्या आहेत. यामध्ये अनेकांनी त्यांच्यावर कारवाईची मागणीही केली आहे. नुकतेच प्रा. हरी नरके यांनी देखील याप्रकरणी वानखेडे यांना सरकारी सेवेतून बडतर्फ करावं अशी मागणी केली होती.