मुंबईः उपमुख्यमंत्री देवेंद्र फडणवीस यांनी २०१९मध्ये सत्तास्थापनेसाठी शरद पवारांसोबत बैठका झाल्याचं सांगितलं होतं. परंतु नंतर दोन दिवसांनी पवारांनी निर्णय बदलल्याचं फडणवीसांनी सांगून पवारांवर आक्षेप घेतले होते. त्याला सायंकाळी शरद पवारांनी पत्रकार परिषद घेऊन जोरदार प्रत्युत्तर दिलं.

पत्रकार परिषदेदरम्यान पत्रकारांनी पवारांना फडणवीसांसोबत बैठका झाल्या का? असा प्रश्न विचारला. त्यावर बोलतांना शरद पवार म्हणाले की, भेटले ही गोष्ट खरी आहे आणि चर्चाही झाली. यासंबंधीचं धोरण मी दोन दिवसांनी बदललं, असं फडणवीस म्हणाले. मग त्याच्यानंतर दोन दिवसांनी का शपथ घेतली? त्यांना चोरुन शपथ घ्यायची काय गरज होती? आमचा पाठिंबा होता तर दोन दिवसांत सत्ता का गेली? याचा अर्थ असाय की सत्तासाठी आम्ही कुठेही जाऊ शकतो, असं त्यांचं दिसतंय, अशा शब्दांत पवारांनी जोरदार प्रत्युत्तर दिलं.

पवार पुढे म्हणाले की, मी फसवलं असेल तर ते का फसले? उद्या मी तुम्हांला सागतो गव्हर्नर करतो, या शपथ घ्यायला, याल का तुम्ही? यात मोदींचा काहीही संबंध नव्हता. आमची भेट झाली होती. आम्ही आजही भेटतो. परंतु त्यांची अस्वस्थता दिसून आली. ती महाराष्ट्रासमोर यायची गरज होती.

गुगली कसा टाकायचा ते मला माहिती

शरद पवार पुढे म्हणाले की, तेव्हाच्या परिस्थितीचा काय अर्थ काढायचाय तो काढा. हा डाव होता का काय होता, मला माहिती नाही. माझे सासरे होते, सदू शिंदे. ते देशातले उत्तम गुगली बॉलर होते. मोठमोठ्या लोकांच्या विकेट त्यांनी घेतल्या. मी जगाच्या क्रिकेटचा अध्यक्ष होतो. गुगली कसा टाकायचा आणि कुठं टाकायचा, हे माहिती होतं. मी खेळलो नसलो तरी माहिती होतं. फडणवीसांनीच विकेट दिली तर करायचं काय? विकेट घेतली पाहिजे.

यात अजित पवार हे चेंडू होते का? असं विचारण्यात आलं. ते म्हणाले की, देवेंद्र फडणवीस कुठं जाऊ शकतात, काय करु शकतात, हे दिसून आलं; बाकी काही नाही.