मुंबईः मुंबईमध्ये ३१ ऑगस्ट आणि १ सप्टेंबर रोजी होणाऱ्या बैठकीच्या अनुषंगाने आज नाना पटोले यांनी उद्धव ठाकरेंची भेट घेतली. या भेटीनंतर ठाकरे गटाचे नेते संजय राऊत यांनी शरद पवारांच्या बाबतीत थेटपणे एक विधान केलं आहे.

काँग्रेस प्रदेशाध्यक्ष नाना पटोले यांनी 'मातोश्री' निवासस्थानी जात उद्धव ठाकरे, आदित्य ठाकरे आणि संजय राऊत यांची भेट घेतली. या नेत्यांमध्ये मुंबईत होणाऱ्या इंडिया आघाडीच्या बैठकीबाबत चर्चा झाली. बैठकीनंतर पटोलेंनी माध्यमांशी संवाददेखील साधला.

त्यानंतर संजय राऊत यांनी माध्यमांशी बोलतांना शरद पवारांच्या बाबतीत निर्माण झालेला संभ्रम फार काळ राहता कामा नये, असं विधान केलं आहे. कायम शरद पवारांच्या जवळ असलेल्या संजय राऊतांची भाषा बदलल्याने आश्चर्य व्यक्त होतंय.

काय म्हणाले संजय राऊत?

शरद पवार आणि अजित पवार यांची पुण्यात भेट झाली, त्यामुळे संभ्रम निर्माण होतोय हे खरं आहे. असा संभ्रम वारंवार निर्माण होत आहे. परंतु हा संभ्रम फारकाळ राहता कामा नये. अशा भेटींमुळे आघाडीत चिंतेच वातावरण निर्माण होत आहे. आज नाना पटोले यांनी आमची भेट घेऊन इंडिया आघाडीच्या बैठकीसंदर्भात चर्चा केली. अशी प्रतिक्रिया संजय राऊतांनी दिली.

दरम्यान, ३१ ऑगस्ट आणि १ सप्टेंबर रोजी इंडिया आघाडीची मुंबईत बैठक होत आहे. या बैठकीसाठी शरद पवार, उद्धव ठाकरे, नाना पोटले हे आयोजक आहेत. कालच्या गुप्त भेटीबाबत आज शरद पवारांनी प्रतिक्रिया दिली. ते म्हणाले की, अजित पवार हे माझे पुतणे आहेत. त्यामुळे त्यांनी माझी भेट घेतली तर वावगं काय? मात्र राज्याच्या राजकारणात या भेटीमुळे उलटसुलट चर्चा सुरु झालेल्या आहेत.